Casureco IV na "wow mali" kan NEA
audit
TIGAON, Camarines Sur - An National Electrification Administration
(NEA) nag-ako na napasala sinda kan pinaluwas na audit report na
pigconducir sa Casureco IV kan Octubre 10, 2005 ni Veronica B.
Cruz, director kan Electric Cooperatives Audit Department kan main
office kan NEA.
Sa pinadarang surat ni NEA Auditor Agatona S. Zalatar ki Atty.
Veronia T. Briones, managing consultant kan Casureco IV nag-informar
na sala si petsa na saindang pig-copiahan kan i-summarized asin
pagbalyo kan gabos na contracts/purchases sa suhay na mga papeles.
Sarong “honest mistake” asin mayo man dapat na malicia sa saiyang
parte. An audit pigconducir na mayo nin siisay paman na nag-influencia
sa sainda.
An ginigibong proceso sa pag-audit bako pang final sagcod na an
evaluacion kan manijamiento dai pa nafifinalisar.
Sa enot na audit report ni Cruz, saiyang pigtukar an isyu sa
pagtao nin contrata na pig-award sa privadong contractor na igwa
nin mga diferencia huli ta parati nalang na nakokoa kan MB Versoza
bilang contractor/supplier na envuelto an milliones pesos na
cantidad.
Ipinahayag pa na an sinambit na cooperativa nin corriente nag-aatubang
na sa pagkalugi kan saindang operacion na igwa na nin net losses
na cantidad P3,563.010 kan taon 2004 asin P2,146.192 sa pagtapos
kan periodo kan Abril 30, 2005.
An mga nagluwas na negativong bareta na an cooperativa an na-onambitan
man kaidto ni Board President Dr. Arnel Armea na mayong basehan
asin igwa sanang ibang empleados na nasa likod na may kaanggotan
sa presenting manijamiento.
Mientras tanto, dawa habong akoon kan manijamiento na dai sinda
nalulugi sa operacion alagad malaog na sa Investment Management
Contract (IMC) nganing padalaganon an cooperativa nin privadong
capitalista.
