Negocianteng intsik kasabuat
sa human smuggling
IGWANG kasabuat na negocianteng intsik sa Ciudad nin Naga kasunod
kan mga report na nagdakul an ilegal na dayuhan na Chinese
national na nakalaog digdi kan bulan nin Deciembre 2005 mala ngani
igwa nang 100 na intsik an na-arestar sa Baclaran, Manila na mayo
nin mga documentos an saindang paglaog sa Filipinas asin
nakatalaan nang ideportar.
Pigtutubodan na kabali an Naga na nalaog kan sindicato sa human
smuggling asin pig-iinvestigaran na kan Bureau of Immigration and
Deportation (BID) district office an mga informacion na may pig-aarkilahan
nin apartment sa Barangay Balatas asin Concepcion Pequeña.
Si Abogado Jose Tria, Jr. regional alien control officer kan BID
sa Ciudad nin Naga nagsabi na igwa na sindang mga narecibing
report asin nakatalaan na nindang susogon an mga pigtatagoan kan
mga ilegal na dayuhan na posibleng kapot nin dakulang negocianteng
intsik sa Naga.
An modus operandi kan mga Chinese national na mayo nin mga
documentos sa paglaog sa Filipinas na-agom nin Filipina dawa
katabang sa harong na iyo an gagamiton sa pag-koa nin business
permit.
An BID, City Hall asin Naga PNP enot nang naglansar nin campania
contra sa mga ilegal na dayuhan may duwang taon na an nakaka-agi
sa 8ng mga negocianteng Intsik na saindang nagkadarakop doce (12)
an pig-deportar huli kan dai nakapresentar nin mga documentos asin
consideradong illegal alien.
Sinabi ni Tria sa Bicol Mail huli ta kulang an saindang personajes
sa district office naghagad na siya nin miembros kan prosecution
gikan sa saindang oficina central ngaing maglansar nin operacion
contra sa mga ilegal na dayuhan bako lang mga intsik envez pati na
an nagdadakul na numero nin mga Bombay.
Kan Noviembre 3, 2005 an operativa kan BID pig-arestar an sarong
Indian national na pigbistong si Indervit Singh sa Balatas Temple
kan mga Bombay huli overstaying sagcod na tolos pigdara sa Manila
na dagos na pig-deportar sa saindang nacion.
