---

POC laban na sa jueteng

Resolucion ipapadara ki PNP chief Lomibao

(Photo Caption) MITING KAN PEACE AND ORDER COUNCIL. Si bise alcalde Gabby Bordado (nasa tahaw) iyo an naging presiding officer sa regular na tiripon kan consejo na pig-atendiran kan mga miembros gikan sa manlaen-laen na sectores kan Ciudad nin Naga. Nagkasurondoan na suportaran an resolucion sa paglaban sa ilegal na sugal na jueteng. (Randy Villaflor)

An Peace and Order Council (POC) sa Ciudad nin Naga nagpasar nin resolucion na naghuhurot sa Philippine National Police sagcod sa mga oficiales nacional asin local na puhoon na an jueteng sa nacion.

Pinangengenotan ni Roy San Ramon, presidente kan Naga City Press Corps an pagpadreno kan resolucion na suportado ni P/Supt. Ramon Ranara, jefe de policia kan Naga asin kan gabos na miembros kan POC.

Si alcalde Jesse M. Robredo, enot nang nagtiripon kan mga lideres local, non-government organizations asin kan PNP sa pamamayo ni Sr. Supt. Provincial Director Romeo Mapalo sa “Krusada Laban sa Jueteng” nganing magkasararo sa pagpapundo kan illegal na sugal.

An POC meeting pinangengenotan ni bise alcalde Gabriel H. Bordado, Jr. nagsabi na panahon nang magkasararo an consejo nganing pukawan nin atencion si Director General PNP Chief Arturo Lumibao na mapundo na an operacion kan jueteng bako lang sa Camarines Sur envez sa iba pang mga lugar na mahiwas an sinambit na sugal.

An resolucion nagtutuyaw huli ta apesar na na-untok an sugal sa laog na nin apat na bulan, alagad liwat nabuhay kabali na digdi sa Bicol.

Sa ginibong paglansar kan Pagkasararo Laban sa Jueteng kan Enero 21, 2006 sa Ciudad nin Naga na-ngengenotan kan crusada si Obispo Oscar kan Linggayen, Pangasinan, na napundo an jueteng sa Camarines Sur kan mag-abot sana an Obispo alagad pagkahapon balik an regular na centralisadong operacion sa provincia.

An kapobrehan iyo an victima kan padagos na operacion kan sugal mientras na an nakikinabang iyo an mga curaptong official kan PNP asin civilian officials kaya panahon nang mapuho na naki-aram na an simbahan.

An jueteng sa Camarines Sur asin iba pang provincias kan Kabikolan nagpapadagos sagcod sana man sa patanid si Chief Supt. Regional Director Victor Boco na saindang iimplementar an “one strike policy” kan camp crame.

An POC, naghiro na nganing ipadara an resolucion ki Lomibao huli ta mayo man naheheling an senciridad kan mga provincial director asin oficiales local na mapundo an sinambit na sugal.

An POC kan City Hall componido kan mga miembros hali sa PNP, PDEA, BFP, prosecution office, sector nin negociantes, media, professional, education, Liga ng Barangay, BJMP asin iba pa.