Naga sagcod sana sa Palarong
Bicol 2006
AN local na gobierno kan Ciudad nin Naga preparado na maging
presentador sa ika-tolong veces kan Palarong Pambansa 2006, alagad
an ibang mga oficiales local asin DepEd an duda na makoa kan
ciudad an subasta mientras na an saindang karibal iyo an Puerto
Princesa City na an alcalde digdi si Edward Hagedorn harani ki
Presidente Gloria Macapagal-Arroyo.
Si bise alcalde Gabriel H. Bordado, Jr. nagsabi na saindang
puedeng andamon giraray an Palarong Pambansa ‘06 sa bulan nin Mayo
asin kun mangyari ini ika-tolo nang veces enot kan taon 1997 asin
2002.
Igwa na sindang sports facilities sa Barangay Pacol na pig-aandaman
na an maabot na Palarong Bicol ‘06 na pigtalaan sa Marzo 19-25.
Dai segurado kun magagamit na an Metro Naga Coliseum sa CBD II
dawa na ngani igwa na nin fondo sa pagpadagos kan patrabajo alagad
kulang pa nganing totalmente nang matapos an proyecto.
Bako pang mahiwas asin dai pa completo an Metro Naga Sports
Complex sa Barangay Pacol kaya posibleng an provincia makasabay
man huli ta yaon pa digdi an mahiwas na Sports Complex sa Barangay
San Jose, Pili, Camarines Sur.
An ibang mga oficiales kan Capitolio Provincial nagsabi na dai man
mangyayari na susulohon sana kan ciudad an Palarong Pambansa ‘06
huli ta sadit an saindang Sports Complex asin kaipuhan man giraray
magsaro an provincia mientras na yaon digdi an mas mahiwas na
Sports Complex.
Madidificilan pa an City Hall na makahagad nin fondo sa Malacañang
para sa contruccion nin dagdag pang mga sports facilities huli ta
contra partido sinda ni Presidente Gloria Macapagal-Arroyo.
An pagdara kan Palarong Bicol ngonian na taon sa Naga matapos
sayumahan kan gobierno provincial kan Camarines Norte na sinda an
maging presentador huli ta dai pa preparado asin kulang pa sa
fondo sa pagrehabilitar kan mga sports facilities.
