---

Cagrit nin Cowaw

“Na cagrit an Cowaw sa tahaw can nariribongan na sosyodad,
Na cagrit ta nagimata, napokawan, asin nariribaraw.
Na cagrit nin hule sa gawi can mga nagpapasaway,
Cagrit matapos na mag-atid-atid sa mga isyus can aldao”


Pulis Patola

Dapat ng maghinopog an mga kapulisan sa jefatura can Naga
Ta dakul na an nagtotobod sa bansag na sinda mga “Pulis Patola”.
Nin huli sa tambak na mga krimen na dae ninda nare-resolveran,
Ta an pirming palusot: kulang an mga personajes asin kagamitan!

Mayo na nin pagri-ano o pagkatakot sa pulis an mga kriminal;
Maski saen, aldao o banggi, minatira dawa sobra an pagkagarapal!
Si-isay pa an ma-socorro sa mga ciudadano sa oras nin kagipitan?
Kun an mga kapulisan padagos na nagtuturog duman sa pansitan!

Kwasa kaya an hefe maluya an boot, kulang sa toltol na pagmanehar.
Mga pulis maluya sa intelligence, investigation, asin mga ka-araman.
Kulang man an police visibility, asin an pagpatrolya sa kapaligidan,
Para ma-ontok an naglalalang incedentes nin garadanan asin harabonan!

Lakop man an droga, illegal na sugal, rambol, asin prostitution.
Mga holdapan, rape, bodol-bodol, asin snatching nin cellphone.
Haloy an pagresponde can pulis sa mga apod pag sinda kaipuhan
Ta raot daa an mobile car, mayong gasolina, o mayong paki-aram!

Kaya paano ta ma-aapod an ciudad na sarong maogmang lugar,
Kun abot sa liog an paghadit can mga namamanwaang naka-istar?
Paano mapapacarhay an local na turismo,
o maka-enganyo nin dakul na mga investors para digdi marenegosyo?
Kun maluya an seguridad na naitata-o can kapulisan sa publico!