Nagsalakat, naggadan sa Japanese national,
2 pa naarestar kan PNP
San
Fernando, Camarines Sur – Matapos kan anom na bulan na salakaton
asin gadanon an Japanese national na si Tomoyoki Nishikawa, 40,
kan Agosto 2, 2005 sa Barangay Planza, naarestar na kan mga
miembros kan PNP an principal na suspechado asin duwa pang mga
kaibahan na envuelto pa sa nagkaperang robbery hold-up sa
premirong distrito kan Camarines Sur.
Natalikop kan San Fernando PNP na pinangenotan mismo ni Chief of
Police P/Inspector Emard Gomes iyo sinda Martin Aguila, Adriano
Aretana na pigbisto kan balo na si Violeta Regidor-Nishikawa na
iyo an nagsalakat sa saiyang residencia mientras na si Aguila iyo
an nakagumolan kan saiyang esposo sagcod na badilon nin shotgun.
Kabali pa sa nadakop iyo si Randy dela Cruz, gabos sinda taga
Hobo, Minalabac, Camarines Sur.
An mga suspechado an tulos nagpahimotik sa prensa sa sinambit na
caso kan sinda i-atubang sa media sa oficina ni Sr. Supt.
Provincial Director Romeo Mapalo matapos madakop kan Sabado (Febrero
18), sa sarong beer house sa San Fernando na posibleng igwa naman
nin target na victimahon.
Sa cooperacion kan mga residentes huli ta naheling na may mga
sukbit nin armas asin hand grenade tulos nagresponde an policia sa
pamamayo ni Gomez sagcod na napalibotan an beer house asin dagos
nang pig-arestar na nasamsam sa sainda iyo an duwang calibre 38ng
badil asin granada.
An local na gobierno digdi nakatalaan na magtao nin ondra sa
policia sa paagi nin comendacion na nagsugo na si Alcalde Sabas
Mabulo sa Sangguniang Bayan na magpasar nin resolucion para sa
sinambit na katuyohan.
Enot nang nakarecibe nin comendacion an San Fernando Police
Station matapos kan sunod-sunod na pagkakadakop kan mga suspechado
sa droga asin panlulupig na pig-omay an liderato kan jepatura.
Sa mga nagkadarakop sinda igwa nang inaatubang na mga caso
criminal arog ni dela Cruz sa casong robbery hold-up asin
frustrated murder sa Libmanan, Camarines Sur na an nagreclamo asin
victim si Reynaldo Gonzales. Afuera pa kaini siya parolado sa
casong robbery hold-up alagad liwat naman nag-aatubang nin mga
caso criminal.
Igwa pa sindang mga casong robbery hold-up sa Pasacao asin Cabusao,
Camarines Sur asin pig-iinvestigaran kan ibang mga posibleng caso
na sinda an responsible.
