Sa Aniversario kan EDSA 1
Protesta ilalansar vs Presidente Arroyo
Bako
sana sa Manila an celebracion kan ika-20ng aniversario kan EDSA 1
envez digdi sa Camarines Sur papangenotan kan mga militanteng
grupo asin iba pang mga sectores nganing rumdumon an revolucion na
nagpabagsak ki dipuntong dictor Ferdinand Marcos kan taon 1986,
asin nagpatukaw ki Presidente Corazon Aquino sa Malacañang.
Kasabay kan saindang celebracion kan pagrukyaw kan People Power 1,
malansar sinda nin protesta sa pagpadagos kan kahurotan na dapat
magdemiter na sa puesto si Presidente Gloria Macapagal-Arroyo huli
ta bako man na ligitimong presidente asin pano nin curapcion an
saiyang administracion.
Si Jaris Beda, lider kan Bayan Muna sa Camarines Sur nagsabi na
magkaka-igwa nin people’s caravan gikan sa apat na congressional
district kan Camarines Sur na magtitiripon alas 2:00 nin hapon
sagcod na magkaka-igwa nin torch parade sa mayor na calle kan
Ciudad nin Naga na gigibohon sa Viernes, Febrero 24 asin malawig
an saindang mga programa sa Febrero 25 na iyo an aldaw kan paghali
na sa Malacañang ni Marcos.
Sinabi ni Beda na dapat tawan nin halaga an celebracion kan EDSA
I, alagad namumundo sinda sa ngonian huli ta an administracion ni
GMA pano nin ramog nin curapcion kabali na an P728 milliones na
anomalia sa fertilizer, pagkaka-envuelto ni first Gentleman Mike
Arroyo sa ilegal na sugal na jueteng, helo Garci, yaon pa an
pagpatios sa namamanuan Filipino sa pag-implementar kan 12 por
ciento kan EVAT.
Magkaka-igwa sinda nin vigil sa Plaza Quezon asin gigibohon an
concierto laban sa charter change.
An duwang aldaw na mga programa sa Plaza Quezon kabali an mahiwas
nang mga pangapodan na kaipuhan na magtagbang na sa puesto si
Presidente Arroyo asin ini ginigibo na sa People Power Monument sa
Manila na participado nin manlaen-laen na sectores asin mga
militanteng grupo.
Sinda nagpaseguro na magkoa nin mayor’s permit sa City Hall huli
ta posibleng mag-implementar nin CPR an PNP.
