> Paglagda
kan mga bagong libro
Nadadangadang an pag-abot kan mga bagong libro sa Bikol na sinurat
kan satuyang mga kahimanwa. Kasu udma (Pebrero 21) pormal na
inilagda an sakuyang ikaduwang libro na may parehong titulo kan
kolum na ini an SANTIGWAR, duman sa Aquinas University of Legazpi
na iyo para samuya an pinaksentro kan kulturang Bikolnon digdi sa
satuya nin huli ta minsan sa rikas kan dalagan kan panahon
hinhingowa nindang dai pabayaan an mga artista asin parasurat
Bikolnon. Ginibo sa Makusog Hall kan nasabing unibersidad, an
paglagda kan librong Santigwar: Mga Rawitdawit sa Bikol asin
Filipino, kapinunan ini kan iba pang gigibohon na paglagda. Kaya
inaalok ko kamo gabos na magsuporta asin magbakal kan librong ini.
Sa Lunes (Pebrero 27) magkakaigwa man nin paglagda sa University
of Nueva Caceres sa oras na alas kuwatro asin sa Pebrero 28, sa
Instructional Media Center kan Ateneo de Naga University sa
parehong oras na alas kuwatro. Hirilingan tabi kita.
Mababakal man an libro sa St Pauls, Giringgiting, RCL Bookstores,
Kadlagan, Holy Rosary Minor Seminary Museum asin Raul Roco
Library, sa mga Bikolnon na yaon sa luwas kan Pilipinas, pwedi
kamong magbakal kan saindong kopya, magpadara lamang nin e-surat
(email) sa boronyog@yahoo.com. May laog ining 75 mga rawitdawit sa
Bikol asin Filipino manunungod sa manlain-lain na tema kan
satuyang sadiri asin komunidad na kinakayonan. Pagrokyaw ini kan
mga personal na espasyo kan parasurat na nabubuhay sa panahon nin
pagsalingoy sa suanoy asin mga kontradiksyon kan eksperinsya na
dai maibabataran na laogon kan sentido asin puso. Dakulang ambag
sa pinapatalubong literaturang Bikol, an Santigwar mawot nha
mag-alok tanganing bulongon an banwaan asin an Bikol sa mga
nakaibang yawa asin mga tawong-lipod. Mayaman an boot sabihon kan
titulo kan libro na pwedi ining hilingon sa manlain-lain na
anggolo siring kan proseso kan pagsurat, materyal na susuraton,
ano an epekto kan pagsurat asin kadakul pang iba na pwedi
makatulod tanganing an ibang linya kan pag-adal tuklason asin
hingowaon na pakarhayon arog kan historya, siyensya politika,
literatura asin an kagabsan na kultura kan Bikol na may dakulang
kiling na maging purog asin kurubalan sa mga estandarteng
nagigilo-gilo.
Siring man, ipinapaisi ko man an pagluwas kan bagong libro ni Fr.
Philip R. Bersabe an THE CHURCH AND THE CRISIS OF TRUTH (UST
Publishing House) na ilalagda man sa Lunes, alas nuwebe nin
pagka-aga sa Holy Rosary Minor Seminary. An ikaduwang libro ni Fr.
Philip napapanahon asin orog na nagpapatunay kan dakulang
katungdan kan sarong institusyon arog kan simbahan tanganing
magtanos kan mga dalan asin sugong na pag-isip mapapadapit sa mga
nangongoron na elemnto kan katotoohan na satuyang pigtutubod. Si
Fr. Philip matatandaan na nagluwas naman kan saiyang enot na libro
an BALALONG: MGA KASABIHAN NA BIKOLNON na iniluwas kasu nakaaging
taon. Sa pag-abot kan saiyang bagong libro hinihipnoan niya an mga
bagay na dai kayang sambiton o dai na kayang pag-oralayan pa sa
pulpito o minsan sa mga programang pankalag kan simbahan. Sa
panahon na gabos naghahagad kan katotoohan, an librong ini
minabukas na bagong bintana na pweding kitang magmansay sa magayon
na hardin kan satuyang pagtubod. Sa pagluwas kan akdang ini ni
Father Philip bako sanang mga nobena, surat pastoral, mga papelita
sa parokya, mga Misal na Bikol an kayang ipaluwas kan simbahan
niyato ngonyan. Kaya na kaining makisabayan asin magtaong
direksyon kun ano man nanggad an saiyang katuyuhan sa buhay nin
mga paratubod. Suportahan ta po ini ta satuya ini.
