---

CSur jueteng free,

sabi sa pagtubod ni PD Mapalo

Kun si Sr. Supt. Romeo Mapalo, PNP Provincial Director sa Camarines Sur an hahapoton “Jueteng Free” an provincia envez kun igwang mga correador iyan sa E-Z 2 kan Philippine Charity Sweepstakes Office (PCSO).

Ini apesar kan mga sombong na nakaka-abot ki Alcalde Jesse M. Robredo kan Ciudad nin Naga, provincial coordinator kan Krusadang Bayan Laban sa Jueteng na aro-aldaw pa an padara kan mga resulta kan bola kan jueteng na ginigibo sa mga banwaan kan Libmanan, Calabanga, Bato, Pasacao, Goa-San Jose, Pili asin iba pang mga banwaan.

Pigpaliwanag sa media ni Mapalo na an ginigibo kan mga correador sa E-Z 2 si regular na tayang P10.00 pinapatongan nin P 2 asta P4 na digdi man sinda nag-gaganancia sa aro-aldaw na paglibot.

Dai tubod si Robredo kan mga paliwanag kan Provincial Director huli ta igwa nganing manga patama sa tolong veces na pagbola aro-aldaw an nang-gagana pigcocobra gikan sa correador sa jueteng bakong hali sa PCSO.

An sabi kan mga oficiales local kan Ciudad nin Naga na nagcacampania laban sa jueteng na mas marhay pa an mga residentes kan barangay an nakaka-aram na may centralisadong operacion kan sugal sa Camarines Sur, alagad si Mapalo dai maaraman an dahilan na ferming pigpapadatulan mayong jueteng envez collector sana kan PCSO.

Napag-araman sa oficina kan PCSO na mayo man sindang awtorisadong correador sa E-Z 2 na lakop na sa manlaen-laen na banwaan kan Camarines Sur.

Mas marhay pa si Alcalde Edward Hagedorn kan Puerto Princesa na pigsugo ni GMA na magtabang sa campania contra sugal na jueteng an nakaka-aram na centralisado na an sinambit na sugal sa area of responsibility ni Mapalo.

An Krusadang Bayan Laban sa Jueteng na an pinaka-pamayo si Obispo Oscar Cruz kan Lingayen, Pangasinan an suportado na kan Peace and Order Council kan Ciudad nin Naga mala ngani nagpasar na nin resolucion na pighahagad ki PNP Chief Arturo Lomibao na pa-untokon na an sinambit ba ilegal na actividad.