Dir. Torres balik sa
puesto
Dir. Torres balik sa puesto
Turn-over ki Dayao, iginilid
Pili,
Camarines Sur – Na-extendir nin anom na bulan sa servicio sa
gobierno, dai pa nacontento liwat naghagad na palawigon pa sa
puesto nin tolong bulan. Si Regional Executive Director Balagtas
Torres, balik naman sa puesto sa oficina regional kan Department
of Agriculture matapos irecomendar sa Malacañang ni Secretario
Domingo Panganiban.
TORRES
Nag-aandam na kuta kan programa sa simpleng turn-over kan Lunes si
Dr. Jose Dayao hali ki Torres alagad nag-abot an Memorandum hali
ki Executive Secretary Eduardo Ermita na firmado na an extension
of service nin tolong bulan o abot sa Abril 31, 2006 si Torres
bilang Regional Executive Director kan DA Bicol.
Si Assistant Regional Director Dayao igwa nang napupugolan na
Special Order na firmado ni Secretary Panganiban na pig-designar
bilang OIC Regional Executive Director na nag-efecto kan Febrero
1, 2006. Ini matapos irecomendar siya ni Torres huli ta dapat
nagretiro na kan Enero 31, 2006, igwa palan nin ibang ginigibo na
makabalik si Torres kaya ngani ferming mayo sa oficina asin nasa
Manila, kan Viernes (Febrero 3) nag-abot an memorandum hali ki
Ermita na pinapalawig pa an servicio kan maretiro nang pamayo kan
sinambit na agencia de gobierno. Huli kaini si programa para sa
turn-over kan oficina kan Lunes hali ki Torres pasiring ki Dayao
sagcod sana sa preparacion.
An memorandum ni Ermita petsado Enero 27, 2006 alagad igwa palan
nin hinihimo si Torres nganing magpadagos sa puesto sa DA.
Nagkapera nang mga empleyados na dai muna nagpasambit kan saindang
pangaran nagsabi na pinapaluwas kan DA na si Torres na sana an
calificado sa posicion kan sinambit na agencia apesar na dakul an
mga calificado siring ni ARD Dayao.
Si Dayao, enot nang nag-ambicion na makatukaw sa sinambit na
puesto matapos magretiro sa servicio si Dr. Fe D. Laysa alagad
huli ta mayong politicong nagtabang sa saiya si Dr. Hector Sales
iyo an pigdesignar na OIC Regional Executive Director.
Dapat nagretiro na si Torres kan Julio 31, 2005, naghagad nin
extension sa servicio sagcod na nakakoa nin nombramiente sa tabang
kan saiyang ka-clase sa U.P. Los Baños, Secretary Panganiban asin
nadestino siya digdi sa Bicol hali sa region cuatro.
Naging controvercial an pagkakadestino niya sa Bicol matapos
cuestionon ni dating OIC Director Hector Sales an mga papeles kan
saiyang nombramiento mala ngani sagcod sa ngonian pendiente pa an
casong usurpation of authority na pigbuhay giraray ni Sales kan
magplantiar nin motion for reconsideration.
Napag-araman na si Dayao an namumundo kan sinambit na incidente
apesar kan mga ginibo nang preparacion asin enot nang nagpahayag
si Torres na dai na mahagad nin pagpalawig sa servicio alagad
melagro habo pang bayaan an oficina.
