---

Drug Rehab Center sa CS dai aram ni Monson

Ma-apat nang taon natapos an edificio kan Drug Rehabilitation Center sa San Fernando, Camarines Sur alagad an extension office kan Malacañang digdi sa Bicol dai nag-aaram na may edificio kaini na ginastosan nin P5 milliones kan gobierno.

Si Presidential Assistant for Bicol Affairs Tomasito Monson nagsabi na dai siya nag-aaram na saro nang “white elephant” an sinambit na proyecto. Plano niyang visitahon sa Barangay Pamukid, San Fernando, Cam. Sur sagcod na aramon sa oficina ni Alcalde Sabas Mabulo kun ano an problema ta dai pa nagiging operational.

Nabigla si Monson kan ipaabot sa saiya kan media an informacion na haloy nang tapos an edificio kan Drug Rehabilitation Center sa Camarines Sur, alagad dai man napapakinabangan. An proyecto natapos kan panahon pa ni dating PNP Regional Director Enrique Galang na an fondo naconsiger ki Congresista Rolando Andaya, Jr. kan premirong distrito kan Camarines Sur.

Si Andaya asin Galang iyo pa si nangenotan kan gibohon si inaguracion kan natapos na edificio ma-apat nang taon an nakaka-agi na sa ngonian palibot na nin kaduotan mayo pa nin concretong kudal.

Kan makaolay si Alcalde Mabulo, sinabi kaini na pig-hahace na kan Department of Health (DOH) na maging operational na an Rehabilitation Center an problema iyo an kawaran nin mga facilidades huli ta si fondo sana kan proyecto para sa construccion kan edificio dai pa kabali si fondo sa pagkoa nin mga doctor asin mga empleados.

An mga oficiales local kan San Fernando asin an DOH nagtutubod huli kan pagkaka-nombra na ni Presidente Gloria Macapagal-Arroyo ki Andaya sa puestong Secretary of Budget and Management tibaad matagamahan nin fondo nganing magamit na kan mga paciente na lulong sa droga.

Kabali pa sa problema iyo an kawaran nin concretong tinampo kun igwa man mga putol-putol sana na kaya sanang maka-agi an padyak kun bakong mauran. (Gr)