Natural farming malakop sa Albay
An local na gobierno kan Daraga, Albay nakatalaan na magpadreno
nin Comprehensive Seminar on Natural Farming in the Philippine
Settings sa Febrero 16, 2006 na paparticiparan kan mga oficiales
de barangay, residentes kan banwaan na ini asin gikan pa sa ibang
mga municipalidad kan Albay.
Si Alcalde Gerry R. Jaucian asin mga miembros kan Sangguniang
Bayan naglaog na sa proyectong ini nganing makatabang sa
pagpahiwas kan programa sa livelihood na kaipuhan ngonian na
panahon nin crisis sa economia huli ta mas makakatipid sa gastos
sa aro-aldaw na pambahog sa ataman na hayop arog kan orig. Ini sa
paagi nin pag-gamit nin producto agricultural mayo pa nin mga
chemical na pighahalo sa pagpakakan sa hayop.
Si Andre K. Lim asin Ms. Josephine Gamboa iyo an magiging mga
speakers asin an proyecto narealisar sa tabang ni Consejal Julian
C. Lavadia, Jr. kan Ciudad nin Naga.
An kaparejong seminars ginibo naman sa nagkaperang mga banwaan kan
Camarines Sur asin Ciudad nin Naga na nagka-igwa na nin positivong
resulta an mga programa sa livelihood sa pag-ataman nin hayop na
kulang an gastos.
Pighace an sinambit na proyecto huli ta makakatipid mas halangkaw
pa an puedeng ganancia, maibitaran an mga side effects sa
agrochemicals kan mga consumedores asin paraoma.
An jefe ejecutivo kan Daraga, nagsabi na sa maghapon na seminar
dakul an ma-aaraman na mga estratihia nganing maparikas an
pagpatalubo kan ataman na hayop na dai na kaipuhan an pagbakal pa
nin mga mamahalon na mga pambahog.
Bako lang residentes kan saindang banwaan an nagpahayag na
interesado na mag-atendir sa seminar envez maging si hali pa sa
ibang mga banwaan huli ta mayo man nin registration fee na
pighahagad an organizers.
