P3-M na contra sa meter reading
dapat cancelaron
Libmanan, Camarines Sur – Si Board President Eugenio Lagasca, Jr.
kan Camarines Sur I Electric Cooperative, (Inc) dai na tubod na
nakakatabang sa manijamiento an padagos na pag-contrata sa meter
reading kan consumo nin corriente kan mga consumedores sa
privadong contratista envez na dapat ibalik na sa empleados dai pa
malulugi nin P3 milliones cada taon an cooperativa.
Nalulugi na ngani an operacion kan Casureco I nin sobra sa P10
milliones cada bulan kaipuhan cancelaron na an contrata ki Rene
Ang na iyo an nakakoa kan contrata sa pagbasa kan kuntador kan mga
consumedores cada bulan.
Sinabi ni Lagasca na sa saindang masunod na board meeting saiyang
dadarahon sa atencion kan saiyang mga pag-iriba dawa na ngani an
ibang miembros kan junta an nagsusurog sa manijamiento na ipadagos
na paagihon sa contrata an pagbasa kan kuntador kan mga
consumedores.
Kun sa mga empleados kan cooperative an magibo kan regular na
meter reading cada bulan dai magastos nin sagcod sa tres milliones
pesos envez puedeng sa transportacion na sana. An paghanap nin
solucion kun panong mababawasan an pagkalugi iyo an dapat tawan
nin prioridad, sabi pa kan Board President.
Igwa nang enot na pigcontrata an manijamiento kan mga nakaaging
taon na iyo an IGI na nagka-igwa nin controvercia huli kan mga
pagcontra kan mga empleados na parejo man kan mga punto ni Lagasca,
alagad cuestionable sa ngonian sa liderato ni General Manager
Francisco Quinones ta’no ta padagos pa ang paglaog sa contrata sa
meter reading.
Sa ngonian entero nang lakma an financial kan cooperative kaya
ngani nakatalaan nang maglaog sa contrata sa Investment Management
Contract (IMC) na padagos pang pig-fifinalisar an contrata entre
kan Castalla asin Casureco I.
Kabali sa nakakapalangkaw kan pagkalugi kan manijamiento iyo an
systems loss na nagsakat na sa 20 porciento cada bulan asin
hababang collection efficiency.
Si Quinones, an nagsugo na maging estricto na sa pagcolecta sa mga
miembros consumedores na dai nagbabayad sa tamang panahon kan
saindang electric bill nganing maibitaran na dai maputolan nin
servicio nin corriente kan Napocor.
Cantidad nin P21-milliones an morosidad kan cooperativa sa Napocor.
