---

Cagrit nin Cowaw

“Na cagrit an Cowaw sa tahaw can nariribongan na sosyodad,
Na cagrit ta nagimata, napokawan, asin nariribaraw.
Na cagrit nin hule sa gawi can mga nagpapasaway,
Cagrit matapos na mag-atid-atid sa mga isyus can aldao”


Delicadeza

Mayo sa vocabulario can Juwes na ini an tataramon na delicadeza,
Ta habong mag-inhibit sa casong personal na kinasasangkutan niya.
Kun may sopog pang natatada, dapat nang botasan niya an caso
Para maibalik an tiwala, asin mahali an pagduda sa Jusgado can publico.

Nin hule sa delicadeza,
Bakong tama na makipaghilingan sa mga tawong may caso sa saiyang sala,
Bakong tama na magrecebi ni ano man na regalo, o cuarta!
Bakong tama na mani-obrahon an pag-paraffle
          para an caso mapaduman sa saiya,
Bakong tama na nababalga an mga proceso na sinusunod sa Judicatura.

Nin huli sa delicadeza,
Nakakasopog na magkaigwa nin mga badilang bodyguards
          hale sa mga poderosong tawo.
Nakakasopog na maghawhaw na igua siyang backer na mga darakulang politico.
Nakakasopog man na gamiton an poder sa personal na kapritso.
Nakakasopog na magdanay pa bilang juwes ta buking na, asin haloy nang bisto!

Kun may delicadeza,
Malinig an pangaran, may onra, asin taas-noo an paglakaw sa tinampo.
Makakahiling nin tanos sa mga mata can si-isay man na tawo.
Sisimbagon an mga kahapotan na mayong pag-alangan o pagkatakot.
Hahampangon an mga akusasyon nin pagkokorakot, asin iba pang sahot.