---

GAITE VS BADIOLA

Budget kan LGU Baao na-hostage ni Badiola

BAAO, Camarines Sur- Bako lang tawo an puedeng i-hostage envez maging an propuestong annual budget kan local na gobierno na puedeng ma-afectaran ngonian na quincenas an sueldo kan mga casual empleados asin iba pang mga proyecto.


GAITE

Ini nangyayari ngonian sa LGU Baao huli kan padagos na nag-iinit pa giraray an politica dawa na ngani tapos na an eleccion dai pa segurado na madadagos an eleccion local sa 2007.

Pig-aacusaran ni Alcalde Mel Gaite an principal na suspechado iyo si bise alcalde Normal Badiola huli ta poon na iparecibe niya an executive budget para sa 2006 kan Oktubre 14, 2005, pig-gilid sana sa oficina kan bise alcalde asin dai pa giraray pig-pasa sa committee level.

Inabot na nin bulan nin Enero 2006 dai pa lamang napoponan an committee hearing nganing hingotohan an propuestong annual budget, sabi pa kan alcalde.

Sa saiyang executive budget cantidad P40.5 milliones na dapat kuta na tapos na an deliveracion asin yaon na sa pag-review kan Sanggunian Panlalawigan.

Afectado kan na-hostage na budget iyo an mga obligacion kan LGU sa corriente, tubig, pagpasueldo sa mga empleados asin mga proyecto na naka-programang dapat iimplementar sa enot na quarter ngonian na taon.

An sabi man ni Badiola dai man puedeng mangyari ini huli ta an masusunod mientras na pendiente pa an pag-aprovar kan propuesto iyo an re-enacted budget afuera kan mga casual na empleados.

Pigbuyagyag pa kan alcalde na an ginibo kan bise alcalde pig-aabala na tutukaron an annual budget sagcod na dai binabalik si appropriation sa sarong empleado kan saiyang oficina. Sa pigsumiter na executive budget hinalian nin prosopuesto huli ta apat nang taon vacante.

Na-anggot si Badiola huli ta an sinambit na vacanteng puesto na may salary grade IV piglaogan niya nin tolong mga casual na empleado na ginibong mga “paraturon papel, paraluto, asin an ika-tolo saiyang chofer sa motorsiklo na ginigibong parahatud niya asin parasundo”, sabi pa sa pagbulgar kan alcalde.

Natutuyawan an bise alcalde huli ta iyo na sana an may paka-aram asin mawot nang maging alcalde envez na magtrabajo bilang presiding officer kan sanggunian.


Pagkaabala kan budget pigbabasol ki Gaite

Si Alcalde Mel Gaite iyo an pigbabasol ni bise alcalde Normal Badiola kun naabala an pagpasar kan saindang annual budget ngonian na taon huli kan dicta na halian nin fondo an posicion na administrative aide clerk IV sa Sanggunian Bayan asin nakiki-aram sa trabajo kan saiyang oficina.


BADIOLA

Pigpahimotikan ni Badiola na dai niya pa pigpasa sa committee level an executive budget mala ngani nakatalaan nang tukaron sa maabot na Lunes asin igwa sindang 90 dias sa pagpasar kan 2006 annual budget.

Pigsacrificio kan alcalde an 78,000 pesos na annual salary kan sinambit na item sa Sanggunian Bayan kun icocomparar sa P40.5 milliones na annual budget ngonian na taon na dapat iprioridad na mapoon palang kan saindang deliveracion.
Kun dai hinalian nin budget an sinambit na posicion dai kuta magkaka-igwa nin problema huli tan ini malinaw na paki-aram sa trabajo na kan bise alcalde asin sanggunian, sabi pa ni Badiola.

Piglinaw ni Badiola na dai siya maparticipar sa deliveracion sa propuestong budget ngonian na taon huli ta puede siyang ma-subjudice mientras na nagsangat siya nin caso administrativo sa Civil Service Commission (CSC) contra sa duwang empleada na kabali sa responsible sa paghali nin fondo sa administrativo aide clerk IV.

An mga empleada sinda; Hayres Barairo, municipal budget officer asin si human resource management officer Arlita Britanico na naka-atubang ang caso nin Grave misconduct and conduct prejudicial to the best interest of the service. An caso administrativo pendiente sa Civil Service Commission kaya ngani nag-inhibit an bise alcalde sa pagparticipar sa deliveracion sa 2006 annual budget.

Pigbuyagyag pa niya na pigsabi kan alcalde na sa espiritu nin Christmas kaipuhan ma-aprovaran kan sanggunian an P700 mil na appropriation ordinance para sa pagbakal nin L-300 van, alagad sagcod sana man digdi si isyu sa sanggunian na dapat magka-irintindihan na sinda pabayaan na sana.

Nabakal na tolos an vehiculo sagcod na saiya nang ginamit alagad piglingawan na si pigsasabi niyang espiritu nin Christmas.

Nagpatanid pa an bise alcalde na dakulang efecto sa saindang banwaan an pagka-abala kan budget huli ta kun ma-re-enacted sana an 2005 annual budget dai puede sindang makapasar nin supplemental budget.

Igwang kagabsan na P4.5 milliones na an P2 milliones hali sa dugang kan saindang internal revenue allotment ngonian na taon asin si P2.5 milliones na calamity fund na dai ginamit kan nagtalikod na taon.

An tolong mga casual na empleado sa oficina kan bise alcalde an dai na pig-renew an anombramiento poon kan Enero 1, 2006. Saiyang pigpahimotikan na ginagamit niya sa mga personal na sugo an sinambit na mga empleados. Alagad an saro saiyang chofer kan motorsiklo sa mga transaccion ninda sa oficina asin nagtatrabajo sa oras sana kan pag-oficina.

Kabali sa mawot paki-aram kan jefe ejecutivo local iyo an pag-nombra kan municipal librarian na na-vacante poon pa kan Oktubre 2005 apesar na an municipal library sakop kan oficina kan Sangguniang Bayan.