Gazmen, raya na sa SP
CIUDAD
nin Iriga- An mapait na experiencia ni Alcalde Madel Alfelor
Gazmen sa laog nin sarong termino bilang miembro kan junta
provincial kan Camarines Sur iyo an naging dahilan na mag-re-election
envez magcandidato sa puestong alcalde ta igwa pang naginibohan
asin nakatabang pa sa saiyang constituentes.
(Photo Caption) Si Alcaldesa Madel Alfelor Gazmen
(sa tahaw) nag-atubang sa miembros kan prensa matapos kan saiyang
State of City Address kan Enero 9, 2006. Mawot nag-re election
envez na magcandidato sa puestong board member.
Habo na siyang mag-ambicion liwat sa provincia kasunod kan mga
informacion na posibleng magcandidato siyang bise gobernador sa
maabot na eleccion local huli kan invitacion nin politico na dai
pa man pigngaranan.
Kan siya miembro pa kan junta provincial na nag-representar kan
cuarto distrito contra partido sinda kan gobernador sagcod na
puros sana debate sa session mayong nahahaman nag-iiriwal pa kan
panahon ni bise gobernador Imelda Papin.
Si Gazmen, nag-atubang sa press conference kan Lunes (Enero 9)
matapos kan saiyang State of the City Address sa atubangan kan mga
miembros kan Sanggunian Panglunsod asin manlaen-laen na sectores.
Saiyang pigbiklad an mga nahaman na programa sa pagpa-asenso kan
Ciudad nin Iriga, programa sa educacion na iimplementar ngonian na
taon, sa agricultura, negocio, pagmantenir kan pace orden nganing
maprotehiran an mga namamanuan asin naglalaog na investor asin
dakul pang iba.
Nagbiklad man siya sa miembros kan media na igwa na siyang
programa nganing ma-enganyar an mga investor na maglaog sa ciudad
sa paagi nin pagtao nin limang taon incentivo na tax exempted,
alagad pig-iinvitaran niya idtong nakakaseguro na dai malulugi kan
saindang negocio.
Pig-implementar na an one stop shop nganing ang mga negociantes na
ma-proceso kan saindang mga papeles sa business permit na dai na
maabala kan paghanap kan mga suhay na oficina.
An Iriga City Police Station, saiyang pig-oomaw an liderato ni
Chief of Police Anacleto Clet na mamantenir an pace orden asin an
naging cooperacion kan saindang namamanuan laban sa criminalidad.
