Magastos na seminar kan DTI,
DILG natuyawan kan LMP CSur
Pagbalga kan AO 103 ni GMA
An DTI, DILG, Gateway East, Inc. sa saindang joint project
nagtalaan nin seminar na inapod na Barangay Consumer Advocacy
Assistance and Protection Team (BARANGAY C.A.P.T.) sa Febrero
7-10, 2006 sa Supreme Hotel, Baguio City.
Si alcalde Mel Gaite kan Baao, Camarines Sur asin presidente kan
LMP Camarines Sur Chapter nagsabi dapat digdi na yan ginibo sa
Ciudad nin Naga o sa Ciudad nin Legaspi dai na malustay nin
dakulang cantidad an mga LGU na an bayad sa registracion sa cada
participante P10,000.
Kun an sarong LGU maatendir an alcalde, bise alcalde, consejales,
mga barangay capt. asin brgy. kagawad, budget officers,
treasurers, market administrators kun mga 20ng hali pa sa mga
barangay asin iba pang pinapa-atendir nganing maging participantes
sa Barangay C.A.P.T. seminar magastos an local na gobierno nin
sagcod sa P400,000.
An LMP Camarines Sur chapter igwang nang enot na panindugan na kun
mapadreno nin seminar an DTI maging an DILG asin iba pang NGO
dapat digdi na sa provincia gibohon huli ta makakasunod pa sa
Administrative Order No. 103 ni GMA.
Apesar kan orden ni GMA daing paki-aram an mapadreno nin seminar
kaya ngani sinabi ni Gaite bilang pamayo kan LMP kun maka-atendir
siya saiyang cucuestionon ta’no kaipuhan pang darahon sa Ciudad
nin Baguio an seminar mientras na an mga participantes hali man
sana digdi sa Bicol.
Napag-araman sa Liga ng mga Barangay an dai nakakaseguro na
makaka-atendir an mga capitanes huli ta mayo pang aprovadong
budget alangan man na magparahagad nin financial assistance sa LGU
na kulang man ngani an fondo.
An seminar iniciativo kan region cuatro, nag-ayon naman an region
cienco mientras na sa ibang region an ginibo na an Barangay
C.A.P.T. Seminar kan nagtalikod na taon.
An technical division kan DILG Bicol dai nag-aaram kan sinambit na
seminar huli ta an informacion igwang taga DTI an nagpafirma na
sana kan papeles ki dating director John Castañeda nganing sugoon
an mga LGU na magparticipar sa magastos na seminar.
Sa memorandum kabali sa mga pinapa-atendir iyo an mga alcalde,
bise alcalde, consejales, planning and development officers,
treasurers, budget officers market administrators, licensing
officers and inspector, chairman kan SK, mga capitanes de barangay
asin barangay kagawad, municipal/city administrators asin iba pang
mga oficiales kan gobierno.
Igwang nagkaperang mga oficiales local an nagsabi na milliones
pesos an makokoa sa bayad sa registracion sa lambang participantes
na saro nang “racket” an mga arog kaining actividad.
Sa entrevista kan Bicol Mail sa paagi nin telepono ki Provnicial
Director Edna S. Tejada kan Camarines Sur sinabi kaini katuyohan
na gibohon sa harayong lugar an seminar nganing an mga
participantes dai magpararuluwas dai pa ngani tapos asin an iba
kulang an naaraman mientras na dai man nacompleto si panahon kan
pag-atendir dai nadangog si mga paliwanag kan ibang mga resource
speaker.
Igwang participantes na sagcod sana sa pagrecibe nin certificate,
alagad kun hahapoton na kun ano an mga naaraman sa mga seminar an
kulang sa pagkasabot.
An proyecto may katuyohan na matabangan an publico para sa
consumer protection na dai na kaipuhan an asistencia kan oficina
kan DTI nganing dai na magpasiring sa Ciudad nin Naga si gikan sa
mga banwaan puede nang accionan kan LGU.
Kun aram na ninda an mga reglamento sa pagprotehir kan
consumedores na binabalga kan mga negociantes an mga participantes
iyo man an puedeng maglansar nin consumer advocacy.
