Orlina, dai pigsurog ni De la Peña
SIPOCOT, Camarines Sur - Sa pagpalyar na maresolveran an mga
sunod-sunod na casong murder an Sanggunian Bayan nagpasar nin
resolucion na pighuhurot ki Sr. Supt. PNP Provincial Director
Romeo Mapalo, na ribayan tolos si Sr. Inspector Chief of Police
Efren Orlina kan Sipocot Municipal Police Station.
Dawa magdayupot an duwa dai pigsurog ni alcaldesa Theresita Dela
Peña si Orlina envez pigfirmahan tolos an resolucion na nag-accion
na si Mapalo pig-relieved na sa puesto poon kasoodma nagribay na
OIC Chief of Police iyo si P/Inspector Jose Baluyot mientras na
dai pa nakakasumiter an provincial director nin tolong oficial kan
PNP na iyo an pipilian kan alcalde na maging full pledged na COP.
An kabali sa mga caso na pighahanapan nin justicia kan saindang
familia iyo an pagkakabadil gadan ki Eriberto Bautista, personal
na bodyguard ni Dela Peña na an incidente nangyari kan Deciembre
24, 2005. An saro naman na caso iyo an pagkakabadil gadan ki
Market Supervisor Serafin Lontok, esposo ni Consejala Cielo Lontok
kan Sanggunian Bayan.
Na-aalarma na an mga oficiales local kan mga casong pang-gagadan
huli ta mga empleados na kan municipio an nagkaka-virictima abala
an ginigibong investigacion kaya nganing mayong sabihon na may
pigtataga sa pagresolver kan caso nagdecicion na an mga oficiales
local na ribayan na an saindang COP.
Si Orlina, sinangatan nin caso administrativo sa Ombudsman ni
Consejala Cielo Lontok alagad pigbasura sana man huli ta
harrasment sana an caso. Dai pa tapos an laban liwat pigpadagos
kan consejales an kaparejong caso sa jefe de policia.
An Provincial Director nagsabi na an arog kaining resolucion sa
pagpahali kan COP saiyang pigtatawan nin prioridad huli ta mismo
na an mga oficiales local iyo an nag-accion kun dai na ninda
kaipuhan an jefe na sa pagtubod ninda kaipuhan na an bagong
liderato sa pagresolver kan mga nangyayaring criminalidad.
Madestino muna sa PNP Provincial Office si Orlina mientras na dai
pa maaraman kun sain na police station siya ibabalyo.
Naghihinakit si Orlina sa Sanggunian huli ta sa laog nin tolong
taon na pagserve niya bilang jefe de policia kan Sipocot PNP, dai
siya pigtawan nin pagkakataon na magpaliwanag kan saindang
ginigibong investigacion sa caso kan market supervisor.
Sa inicial na investigacion, sinabi kan pinahaling COP na
posibleng “planted” an pagbadil sa victima huli ta pigsabay sa
tradicional na purotokan nin rebentador sa pagsabat kan bagong
taon na nangyari mga alas 1:45 nin banggi kan Deciembre 31, 2005.
Duda siya na may motivo political an pagkasararo kan mga miembros
kan Sanggunian Bayan na palayason na siya sa puesto.
Mientras tanto, an caso huli ta mayong resulta sa PNP hahagadon na
kan familia an tabang kan NBI.
