---

Drug rehab center sa San Fernando,

CSur "white elephant" - PNP

Igwa nin Drug Rehabilitation Center an Camarines Sur na puedeng magserve sa mga paciente sa mga pagtaraid pang provincial alagad an PNP nagsabi na saro sana man ining “white elephant” na proyecto kan panahon ni dating Bicol PNP Regional Director Enrique Galang na pigpabulosan nin P5 milliones an construccion kan edificio ni Congresista Rolando Andaya, Jr.

An proyecto igwa nin duwang edificio namumugtak sa limang hectariang lote sa Barangay Pamukid kan San Fernando, Camarines Sur mayo pa nin toltol na tinampo na may laba nin kulang sa dos kilometros hali sa concretong tinampo kan sinambit na barangay na yaon man sa laog kan kaparejong barangay nageestar si Alcalde Sabas Mabulo.

(Photo Caption) DRUG REHABILITATION CENTER - Tolong taon nang pinabayaan kan gobierno, ginastosan nin P5 milliones sagcod sana sa inaguracion mientras na naglalangkaw an mga caso sa drug addiction sa Bicol dai man na-uusar.


Sobra na nin tolong taong nakatiwang-wang an edificio mayo nin palibot na kudal sagcod na napapalibotan pa nin kaduotan kaya ngani an sabi kan sarong oficiales kan PNP Bicol na nagsayuma magpaluwas kan pangaran “white elephant” sana an proyecto.

Na enot kaini, sinabi ni alcalde Mabulo na an naka-ulang iyo an pagbalyo kan supervicion kan Drug Rehabilitation Center hali sa PNP pigpasa na sa Department of Health kaya an problema yaon na sa gobierno nacional na iyo an dapat mag-apropriar nin fondo.

Kan makaolay kan Bicol Mail si bise alcalde Joseph Ragay kan San Fernando, dai man siya tubod na mahuhulog sana sa white elephant an proyecto huli ta dakula nang cantidad an ginastos sa edificio. Napag-aram kani na an enot na babakalon hali sa fondo ni Andaya iyo an gamit sa mga laboratorio asin mga ekipahes kun noarin dai pa maaraman.

Si Dr. Nestor Santiago, regional director kan DOH sa Bicol nagsabi na pighahalat nalang ninda iyo an fondo na kaipuhan an plantilla position kabali na an mga doctor.

Sagcod na mayo nin fondo dai magiging operational an pinaka-enot na rehabilitation Center sa Camarines Sur.

Madidificilan pa nin pagkalap nin doctor mientras na nagluluwas na ngani sa Filipinas huli ta mas halangkaw an pig-oopresir na sueldo sa sainda kan aga employer siring kan USA, asin mga naciones sa Middle East.

Pighagad na kan DOH ki congresista Andaya bilang chairman kan appropriation committee sa Camara-Baja na ibali na sa propuestong budget nacional ngonian na taon. Sagcod sa ngonian dai pa nakakaseguro an sinambit na agencia kun matatagamahan na nin fondo ngonian na 2006.