GMA nagsibog pagvisita sa Albay, CSur
POLANGUI, Albay - Isinibog kan Malacañang an nakatalaan na
pagvisita ni Presidente Gloria Macapagal-Arroyo ngonian na aldaw
nganing maging juespe de honor sa inaguracion kan Quinali Bridge
sa banwaan na ini asin mapasiring sa Camarines Sur.
Ini an confirmacion kan district office ni Congresista Joey
Salceda kan tercer distrito kan Albay na si GMA iyo an pig-invitaran
kan congresista mientras na an proyecto saro sa programa kan
administracion Arroyo sa pagpahaman nin tulay nganing makatabang
sa mga barangay sa saindang pag-transportar kan mga producto
agricultura pasiring sa mercado.
An dai pagdagos ni Presidente Arroyo kan pagvisita sa mga
provincia huli kan nangyaring pagkakadulag kan apat na mga junior
officers na miembros kan Oakwood mutiny. Kabali pa si pigcancelar
kan saiyang viaje pasiring sa Batangas asin Occidental Mindoro.
Si Salceda asin an Philippine Information Agency sa Albay an nag-andam
na kan mga programa kan pagvisita ni GMA, alagad mayo sindang
magiginibo huli kan pinakahuring decicion kan Malacañang.
Naka-programa pang visitahon ni GMA iyo an kamugtakan kan Quirino
asin Andaya Highway sa Camarines Sur na kaipuhan nang maghagad nin
250 milliones para sa repair and rehabilitation kan highways. Dai
paman pigsabi kun noarin madagos kan saiyang pagvisita sa Bicol.
Dakul nang porcion kan sinambit na highway an raraot na iyo na
ngonian an causa kan abalang viaje sa 33 kilometros na Andaya
Highway asin 66 kilometros na Quirino Highway.
