HULI SA DROGA
Mag-agom habang buhay sa Bilibid
Habang buhay magdadamayan sa National Bilibid Prison an mag-agom
na taga Magarao, Camarines Sur matapos magkasuhay na sentencihan
kan Enero 17, 2006 kan corte sa pagbalga kan Acta Republica No.
9165, o mas bistado sa apod na The Comprehensive Dangerous Drugs
Act of 2002.
An mga kinastigo nin habang buhay na malalaom sa carcel sinda
Antonio Rubio, alias “Tatang” asin an saiyang esposa na si
Rechelda Rubio y Artega. An caso criminal contra ki Tatang
numerado 2002-0140 asin pinapabayad pa nin multa sa cantidad na
P400,000.00 mientras na an saiyang esposa sa caso criminal No.
2002-0380 asin pinapapabayad nin multa sa cantidad na
P1,000,000.00.
An mag-agom detinido sa BJMP sa barangay Del Rosario, cuidad nin
Naga nakatalaan nang ibalyo sa National Bilibid Prison.
Si Juez Jaime E. Contreras kan Regional Trial Court Branch (RTC)
Branch 25 sa Ciudad nin Naga iyo an nagbaba kan decicion sa
atubangan kan mga acusado.
Kan Noviembre 14, 2002 an residencia ni Tatang sa Bell, Tomas,
Magarao , Camarines Sur pigsakyada kan Naga City Anti-Vice Squad
sa coordinacion sa Magarao PNP asin oficiales de barangay. An mga
awtoridad nakasamsam sa control asin custodia nin 25 pidasong
sadit na transparent plastic sachet na may laog kan 11.87143
gramos nin shabu, sarong weighing scale TM Tamita asin sarong
rolyo kan aluminum foil.
Dai siya inabotan sa saiyang residencia kan mga awtoridad alagad
naprovaran sa jusgado na an nasamsam na shabu asin iba pang
instrumento sa pag-gamit kan illegal na droga saiyang pagsasadiri.
Naarestar sana siya kan Julio 1, 2003 sagcod na pigbasahan nin
caso kan Julio 14, 2003 na kaibahan an saiyang abogado.
Sa caso ni Rechelda, siya naarestar kan gibohon si pagsakyada sa
saindang residencia kan Noviembre 14, 2002 sagcod na nasamsam an
0.2 gramos nin shabu sa paagi kan poseur buyer sa cantidad na
P500.00. Sa ginibong operacion kan mga awtoridad armado sinda nin
search warrant na pig-isyu ni Juez Corazon tordilla na iyo pa
kaidto an executive judge sa Naga.
