LGU Naga mayong kasurog sa
campania vs jueteng
AN local na gobierno kan Ciudad nin Naga iyo na sana sa mga LGU sa
Cam. Sur an may crusada laban sa pagkabuhay liwat kan sugal na
jueteng sa Camarines, dai pa nahehelingan nin cooperacion si Sr.
Supt. Romeo Mapalo, PNP Provincial Director nganing saiyang
ipapundo sagcod na higot na iimplementar an “one strike policy”.
Si bise alcalde Gabriel H. Bordado, Jr. nagpahayag na envez na
magcooperar an PNP Provincial Office sa campania contra sa jueteng
malalanit pang surat an pigpadara sa City Hall.
Pigdedenuncia kan mga oficiales local kan Ciudad nin Naga an
kawaran nin kakayahan kan Provincial Director nganing matunaw an
illegal na actividad kun igwa man mga nagkakadarakop makaduda pa
pinapaluwas na correador kan E-Z 2 kan Philippines Charity
Sweeptakes Office (PCSO).
Sa maabot na Enero 21, 2006 si Obispo Oscar Cruz kan Lingayen
Pangasinan asin Chairman kan Krusadang Bayan Laban (KBL) sa
Jueteng mavisita sa Naga nganing mag-organisar nin grupo asin
pakusogon an campania contra sa ilegal na sugal.
Si Alcalde Jesse M. Robredo iyo an provincial coordinator kan KBL
sa Jueteng nagtalaan nin meeting sa Villa Caceres Hotel na
aatendiran nin mga oficiales local na nagsusuporta laban sa
sinambit na sugal.
Duda an ibang oficiales local kan Naga kun igwang interesadong mga
LGU na maatendir nganing ipaheling an saindang suporta huli ta
igwa nganing nagcocontra na sa campania ni Robredo sa jueteng huli
ta na-aafectaran an saindang payola.
Kabali sa invitado iyo si Obispo Leonardo Z. Legaspi kan Caceres
asin iba pang lideres kan simbahan sa katuyohan na mabilog an
organisacion nganing palakopon an grupo ni Cruz mientras natukahan
na an jefe ejecutivo local kan Naga bilang provincial coordinator.
Nagpapadagos an tolong veces kan bola kan jueteng sa mga banwaan
kan Libmanan, Del Gallego, Pasacao, Pili, Calabanga, Buhi, asin
San Jose-Goa. Aram na ini kan mga residentes kan barangay alagad
an PNP Provincial Office asin oficiales local an dai nag-aaram.
Sa paliwanag ni Mapalo na putik man an report na mayo sindang
nagiginibo mala ngani igwa man nagkakadarakop na envuelto sa
sinambit na ilegal na sugal.
