SP CSUR NAGBALOS
Pagpakiaram kan City Hall pigcondenar
Pili, Camarines Sur- An Sanggunian Panlalawigan kan Camarines Sur
nagbuelta man nin pagcontra condenar sa Sanggunian Panlungsod kan
Ciudad nin Naga sa isyu kan Plaza Rizal na pinalibotan nin mga
para tiangge an monumento kan gobierno provincial.
Narereparo kan City Hall an gobierno provincial alagad sinda an
dapat tuyawon huli kan mga nangyayaring criminalidad prostitucion,
isyu sa droga napapabayaan asin pagprotehir sa mga negocianteng
intsik, sabi man sa inapon na isyu ni Vocal Waren Senar contra sa
mga oficiales local kan ciudad.
Si Vocal Angel Naval kan Segundo distrito kan Camarines Sur
nagsabi na sa ginibong session regular kan Sanggunian Panlalawigan
kan Enero 17, 2006 naghaman sinda nin joint and collective motion
na nagsusuporta ki Gobernador L-Ray Villafuerte sa mga actividades
na pigconducir sa Plaza Rizal.
An pabalyohan nin acusacion kan duwang LGU efecto kan pinasar na
resolucion kan sanggunian kan Naga na daing pagrespeto sa Plaza
Rizal an ginigibo kan gobierno provincial huli ta fermi nalang
pigpapa-ocupar sa mga para tiangge.
Alagad segun ki Naval an actividades ngani sa Plaza Rizal
nakakatabang sa masa huli ta igwang mga producto na baratong
nababakal. Sa luwas kan Plaza napapalibotan kan mga paratienda nin
frutas, mani asin iba pa na iyo an nakakapakanos sa kapalibotan
kan lugar dai naheheling kan ciudad ta padagos nindang tinutogon.
Pigmamantenir kan provincia an kalinigan an mga paratienda na
pigtutugotan kan City Hall asin ginibong trimobile terminal digdi
nag-aarapon nin basura.
Sa masunod na session regular ipapa-apod kan consejo provincial si
Provincial Assesor Anacita Malali nganing maaraman an technical
description kun sain an saindang linderos huli ta sa luwas kan
Plaza pinapa-ocupar man kan cuidad sa mga paratienda.
Pigpahayag man ni Vocal Rex Oliva na dapat dai makiaram an City
Hall huli ta igwa pang pendienteng apelo sa Corte Suprema an
gobierno provincial asin iyo pa an nagmamanijar.
An isyu sa pagmanijar kan Plaza Rizal enot nang ginana kan ciudad
sa Regional Court sagcod sa Corte de Apelacion asin pig-apelar kan
provincia sa Corte Suprema kaya ngani sinda pa an nagpapadalagan
kaini.
Si Alcalde Jesse M. Robredo sa mga kasimbagan kasoodma sa miembros
kan prensa sa sinambit na isyu nagsabi na bukas sa saindang
kaisipan an mga reparo asin bako sindang “balat sibuyas” na
pinapatamaan an provincia.
Natural sana sinda na mag-defensa ano man na critico kan City
Hall.
An ciudad dai mauntok sa mga pagtuyaw kan sala sa mata kan publico
mientras na naheheling na an makanos na kamugtakan kan Plaza RIzal
na yaon sa laog kan ciudad dai man dapat magpabaya an local na
gobierno.
An kaipuhan nganing ipaliwanag pa ninda sain nagdadalagan an bayad
sa arkila kan mga tiangge. Sain ini ginagamit envez na maangot
ipaliwanag sa mga taga Camarines Sur.
