3ng plaza sa Naga sadiri kan CSur
City Hall nag-angat mapresentar titulo
AN
gobierno provincial kan Camarines Sur iyo an kagsadiri kan
propriedad na namumugtakan kan Plaza Quezon, Plaza Rizal asin
Plaza Quince Martires sa centro kan Ciudad nin Naga na haloy nang
nasa pag-administrar kan local na gobierno kan City Hall.
Ini base sa mga documentos na pigpresentar ni Provincial Assesor
Anacita Malali kan Capitolio Provincial sa session regular kan
Sanggunian Panlalawigan kan Camarines Sur kan Enero 24.
(Photo Caption)
PINAGAYON NA PLAZA QUEZON (retrato sa itaas) asin Plaza Quince
Martires (retrato sa ibaba) na yaon sa centro kan Ciudad nin Naga
regular na pigmamantenir kan City Hall an kalinigan sa haloy nang
mga taon sa pagtubod na an lote kan duwang plaza propriedad kan
ciudad. Alagad planong bawion kan gobierno provincial.
Pigpaheling ni Malali sa sanggunian an technical description sa
cadastral survey kan Land Management Services kan oficina regional
kan DENR sa Bicol sa Ciudad nin Legaspi kabali na an controversial
na Plaza Rizal na ngonian may pendienteng caso sa Corte Suprema na
pig-aagawan kan City Hall asin kan Capitolio.
An survey ginibo kan Julio 1, 1947 asta kan Julio 30, 1949 na an
orihinal na survey inaprovaran kan Julio 21, 1961 ni Rodolfo dela
Cruz, OIC Technical Service Section asin igwa nin tax declaration
an oficina kan City Asessors kan City Hall kan Ciudad nin Naga.
Alagad si City Assesor Ramon Albeus nagsabi na an tax declaration
bakong prueba na sadiri na an propriedad envez kaipuhan
magpaheling nin mga suportadong validong documentos.
An Plaza Quezon asin Plaza Quince Martirez ginastosan na kan City
Hall nganing mapagayon dai man puedeng basang na mabawi kan
gobierno provincial maagi pa sa halawig na laban legal.
An record kan Bureau of Land nagsasabi na yaon sana an “name of
claimant” an gobierno provincial alagad mayo man sinda nin titulo.
Kun mag-agi pa an laban legal sa corte kun arin man sa duwang LGU
an ideclara na maysadiri an jusgado ma-orden sa Registry of Deeds
na mag-isyu nin titulo, sabi pa ni Albeus.
Si Vocal Angel Naval kan segundo distrito nagsabi yaon na ki
Gobernador L-Ray Villafuerte an decicion kun may planong bawion an
sinambit na mga propriedad, alagad sa saiyang opinion dapat
mag-orolay na sana an duwang LGU sa pagpakarhay asin mga programa
kan ciudad asin provincia sa pig-iiwalan na propriedad.
Sa technical discription an Plaza Rizal may hiwas nin 3,096 metros
cuadrado, Plaza Quezon - 2,095 metros cuadrado asin an Quince
Martirez - 1,445 metros cuadrado.
Pigbuyagyag pa ni Albeus na an Sanggunian Panlungsod nagpasar nang
resolucion na ideclara an sinambit na mga propriedad na yaon sa
centro kan ciudad sadiri kan local na gobierno.
Naglalawig naman an conflicto kan duwang LGU matapos ponan kan
Sanggunian Panlungsod kan Ciudad na nagpasar nin resolucion na
nagcocondenar sa gobierno provincial sa padagos na pagpa-arkila sa
mga tiangge kan Plaza Rizal na nakakapakanos sa ciudad huli ta
apesar na plaza gusto pang gibohon na mercado.
An Sanggunian Panlalawigan nagbalos man na nagtutuyaw sa City Hall
huli kan ginigibong paki-aram apesar na bako man ngani sinda
kagsadiri kan plaza. An ciudad ngani may problema sa droga, mga
criminalidad asin human smuggling na envuelto an mga Taiwanese
mayo man nin ginigibong accion an mga oficiales local.
