---

Cagrit nin Cowaw

“Na cagrit an Cowaw sa tahaw can nariribongan na sosyodad,
Na cagrit ta nagimata, napokawan, asin nariribaraw.
Na cagrit nin hule sa gawi can mga nagpapasaway,
Cagrit matapos na mag-atid-atid sa mga isyus can aldao”


Santilmo sa Naga

An Santilmo sarong bolang kalayo na nagpaparalitong sa kadlagan,
Na soboot gikan sa dai natotoninong na kalag can madagang nagadan.
Kaya padagos an pagbantay sa mga dagang saiyang nakamkam,
Ta sa kapasloan asin pagka-gahaman, habo ining malamangan!

May mga santilmo man na buhay pa, pigkakalayuhan na an kalag.
Ta maski bako na saiya an pagkarogaring, pirit pa ining nai-dudulag!
Kaya su mga nakabakal dae man nakikinabang sa saindang mga propriedad,
Ta nasa pangaran pa an mga ini can enhinyirong tuso asin ma-abilidad!

Sii-say an Santilmo sa Naga, na dakul an dagang pagsasadiri?
Na ipinabakal na sa dakul na tawo, pero siya pa man giraray an may pogol digdi.
Sii-say an Santilmo sa Naga na sobra an pagka-poderoso?
Ta dai man nacacastigo maski dakul na an saiyang nakaroloko!

Sii-say an Santilmo sa Naga na may ma-orag asin mahigos na abogado?
Ta gabos na transactiones sa Register of Deeds, pirming areglado!
Sii-say an Santilmo sa Naga na momokoy-mokoy, may dugong Chino?
Pero nakakaregistro nin mga titulo maski tambak an nagrereklamo asin caso!