LMP habo sa pa-seminar
kan DILG-DTI sa Baguio
AN mga miembros kan League of Municipalities of the Philippines (LMP)
Camarines Sur Chapter liwat ma-oponer kan ano man na pa-seminar na
luwas na sa provincia asin harayo nang lugar na malustay sana nin
dakulang fondo an mga local na gobierno.
Si Alcalde Sabas Mabulo kan San Fernando, Camarines Sur nagsabi na
sa Enero 27, 2006 nagkaka-igwa nin regular na meeting an LMP sa
Ciudad nin Naga asin kabali sa saiyang ipapagirumdum sa mga
miembros na igwa na sindang panindugan nganing makaibitar sa
dakulang gastos kan fondo kaipuhan an mga pa-seminar gibohon na
sana sa Ciudad nin Naga o sa laog kan provincia.
An accion kan LMP huli kan nakatalaan na seminar para sa Barangay
Consumer Advocacy Assistance and Protection Team (Barangay Capt)
sa Febrero 7-10, 2006 na gigibohon sa Supreme Hotel, Ciudad nin
Baguio na pigsasabing joint project kan DTI-DILG-Gateway East,
Inc.
Kabali sa mga pinapa-atendir iyo an mga alcalde, bise alcalde,
miembros kan sanggunian bayan, municipal treasurer, administrator,
budget officer, market administrator, kapitanes de barangay asin
brgy. kagawad, brgy. treasurer magin an iba pang empleados kan
municipio kabali na an municipal planning officers.
Kun maaratendir an sinambit na mga oficiales kun sa bilang na 20ng
mga participantes sa registration fee nin P10,000 cada saro sagcod
sa mga oficiales de barangay magastos an LGU nin sobra pa sa P200
mil.
An sinambit na fondo dakula nang cantidad puedeng magamit pa sa
sarong proyecto ano ta kaipuhan magpasiring pa sa Ciudad nin
Baguio puede man sanang gibohon digdi sa Bicol, sabi pa ni Mabulo.
An mga participantes sa sinambit na seminar si hali man sana sa
mga LGU kan Kabikolan kaya pigcocontra ini kan mga alcalde. Maging
si LMP President alcalde Mel Gaite nakatalaan na cuestionon an
sinambit na proyecto dai ngani sinda mapadara nin participantes
huli ta mayo nin fondo an saindang banwaan para sana sa magastos
na pa-seminar.
An seminar na ini kaya man ngani kan LMP na maging co-sponsor
sinda mientras na igwa sinda nin mga resource person. An isyung
ini bubukasan ni Mabulo sa miting ninda kan LMP noodmang Viernes.
