---

3 gadan, 1 iredo sa encuentro sa Sorsogon

Misencounter an incidente - NDF

Sarong jefe de policia, sarong army asin Cafgu an nagadan mientras saro pang soldados an iredo sa nangyaring encuentro kan pinagsarong fuersa kan PNP asin Philippine Army contra sa maabot sa 20ng armadong rebeldeng NPA sa Bolo, Matnog, Sorsogon kan Enero 2, nin matanga.


RAYMUNDO

Si Lt. Col. Serafin Raymundo, oficial na parapahayag kan 9th Infantry Division kan Philippine Army na may base sa Camp Elias Angeles, San Jose, Pili, Camarines Sur pigbisto an mga victima na sinda: Sr. Inspector Eduardo Amande, jefe de policia kan Matnog Municipal Police Station, Pfc Alex Cortes kan 2nd Infantry Battalion kan Philippine, Cafgu Roger De Leon asin an iredo si Pfc Salde Delacerna kan 2nd IB.

An mga victimang soldados mga miembros kan 2nd IB na may base sa Matnog, Sorsogon.

An NDF Bicol sa paagi ni Ka Greg Banares, tolos man nagpahimotok na mga miembros kan rebeldeng NPA an envuelto sa sinambit na encuentro envez misencounter entre kan mga soldados kan Philippine Army asin mga miembros kan PNP.

An informacion nagluluwas na nakatalaan na magserve nin warrant of arrest an mga naka-civilian na PNP sa acusado sa ilegal na droga, alagad huli ta mga alas 11:00 na nin banggi nagka-igwa nin misencounter an grupo kan miembros kan Army asin PNP.

An 2nd IB sa Matnog, Sorsogon, nasairarom kan 9th ID kan Philippine Army na may base sa Camp Elias Angeles, San Jose, Pili, Camarines Sur.

Si Col. Raymundo nagsabi na balo-bagi sana an acusacion ni Ka Greg Banares huli ta gusto sanang paiwalon an PNP asin Philippine Army sa sinambit na lugar huli ta nasa joint operation laban sa mga rebelde.

Propaganda sanay iyan kan NDF mientras na dakul na an accomplismiento kan 2nd IB sa Sorsogon laban sa mga NPA mala ngani 13ng mga high power na armas, 10ng mga low power an nabawi kan military asin duwang NPA an nagadan kan tropa kan gobierno sa saindang campania contra sa NPA, sabi pa ni Raymundo.

Sagcod kasoodma nagpadagos pa an military operation contra sa mga NPA na nagdulag pasiring sa Magallanes, Sorsogon.

An report na nagka-igwa nin encuentro narecibe kan Camp Elias Angeles gikan mismo ki Provincial director Arnold Revilla kan Sorsogon kaya sinisikwal kan militar an sahot kan NPA na PNP asin Army an nagkasagupa.

Maging si Lt. Col. Ernesto Pascual, Battalion commander kan 2nd IB an mayo man nin report sa 9th ID na sinda nang mga polis iyo an nagka-encuentro.

An pigsasabing encuentro sa Sorsogon iyo an pinaka-enot na ralaban matapos kan pig-declarang ceasefire ni GMA kan Enero 1, 2006.

Mientras tanto, an ibang mahal sa buhay kan mga victima an favor na dapat magka-igwa man giraray nin investigacion sa sinambit na incidente.