Acusado sa droga pinalibre kan korte
Matapos nin tolong taon asin duwang bulan sa karcel kan BJMP, Del
Rosario, Cuidad nin Naga sa duwang caso sa pagbalga kan Republic
Act 9165 o an Comprehensive Dangerous Drugs Act of 2002, an
acusado pinalibre kan corte huli kan kawaran nin pusog na
evidencia.
Ini sa binabang joint judgement ni Juez Jaime E. Contreras kan RTC
Branch 25 sa Ciudad nin Naga na nag-susugo sa Jail Warden kan BJMP
na paluwason na tolos an acusado na si Edmundo Compuesto asin
ibalik an P5,900.00 kan Anti-Vice Squad, sa paagi ni SPO3 Julio
Tuason.
An sachets kan shabu asin mga drug paraphernalia an kinomfiscar na
afavor sa gobierno para sa magkakanigong disposicion asin pagraot
kaini.
An acusado naka-atubang nin caso criminal numerado 2002-0429 asin
caso criminal numerado 2002-0430 sa pagbalga kan RA 9165.
Siya pig-acusaran na nagpapabakal nin sarong transparent plastic
bag/sachet na may laog nin Methamphetamine Hydrochloride o “shabu”
na may timbang nin 0.2 grams sa ginibong poseur buyer/police asset
na si warren Ebio asin nasamsaman nin siyam (9) pidasong selyadong
transparent plastic sachet na may laog nin Metamphetamine
Hydrochloride o “shabu” na may timbang 9.4773 grams asin 12ng
transparent plastic sachet na may laog nin marijuana.
An sinambit na nasamsam na mga evidencia iyo an alegacion kan mga
miembros kan awtoridad kan Anti-Vice Squad sa pamamayo ni Julio
Tuason na saindang pigconfiscar soboot sa residencia ni Compuesto
sa Sto. Tomas, Magarao, Cam. Sur. Mientras na sinda armado nin
search warrant na pig-isyu kan corte kan Oktubre 4, 2002 na tolos
nindang pig-implementar mga alas 6:30 nin banggi.
An defensa nag-presentar man kan saiyang evidencia na kan Octubre
4, 2002, naabot palang siya hali sa Manila na nagtrabajo bilang
confidential agent kan NBI, Manila sa irarum kan supervicion ni
Agent Regnim Peneza. Alas 6:30 nin banggi kan kaparejong petsa, an
acusado pig-informaran kan saiyang aki na igwang naghahanap sa
saiya.
An grupo nabisto na miembros kan awtoridad sa pangenot ni Chief of
Police Lorenzo Baylon kan Magarao PNP na sinabihan an acusado na
bukasan an gate nganing iserve an search warrant. Sinabihan kan
acusado na maghalat ta makoa kan liabe sa itaas, envez an mga
polis fuersahan na binukasanan an gate sa paagi nin pag-gamit kan
bolt cutter, sagcod na nakalaog sa residencia. Kan yaon na sa
itaas kinulgan an acusado sagcod na pigramalan asin pigdara sa
ibaba sa sala na digdi pigbasa si search warrant ni PO3 Raul S.
Bongon. Dai nahaloy maabot sa sampolong miembros kan PNP
nagconducir nin pagruskay sa laog asin sa luwas kan saindang
residencia.
Sa paliwanag pa kan defense, sinabi mientras na an mga polis an
padagos sa pagruskay kan saindang master’s bedroom sa itaas, si
Emerland Joyce Compuesto, aki kan acusado, an naheling an saro sa
mga polis na pigkoa si cuarta kan saiyang ama sa jewelry box asin
binugtak sa kahon na saindang daradara. Pagkatapos kaini, an
policeman nagluwas sa terasa sagcod na nagkurahaw na “bingo”. Kan
nagpapadagos pa an pagruskay, si Brgy. Capt. Herbert Ranin nag-abot.
Kan mayo nang makoa an mga awtoridad sa itaas. Kan an raiding team
naghelig na sa residencia, an acusado naheling an policeman na
maydaradara nin sarong kahon na binugtak sa ibabaw kan lamesa. An
kahon maylaog nin cuarta, weighing scale asin shabu.
An acusado nagsabi na durante kan panahon kan paghalog-hog sa
saindang residencia, dai siya tinugotan na makaiba sa grupo asin
dai pinahiro sa sala mientras na guardiado siya ni PO3 Tuason.
An acusado an naogma kan an decicion kan corte huli sa panahon na
gayo kan pasko mag-iiribahan sinda kan familia.
