---

Cagrit nin Cowaw

“Na cagrit an Cowaw sa tahaw can nariribongan na sosyodad,
Na cagrit ta nagimata, napokawan, asin nariribaraw.
Na cagrit nin hule sa gawi can mga nagpapasaway,
Cagrit matapos na mag-atid-atid sa mga isyus can aldao”


Mga kuhol sa Judicatura


Padagos na nararatakan an onra, asin nadidigtaan an Judicatura,
Huli sa salang gawi can nakakapirang personaje na sangkot sa anomalia.
Pigma-madyik an pag-raffle can mga caso, ta ini saindang minamani-obra.
Para siguradong mapaduman sa piniling huwes na may kapot can sala.

Dakula gayod an soborno kaya nawawara an delicadeza.
Mga empleado asin clerk of court magkakoromplot, maka-iriba.
Nalilingawan an gabos basta igua sindang madidilihencia.
Sa saindang kapasloan, maski ngani kalag, matogot na ibenta!

Logod nawawara an tiwala can mga ciudadano sa sistema can justicia.
Dahil sa mga bolok na kamatis, apektado man an gabos na pag-iriba.
Dapat ma-ibulgar an modus operandi, asin ma-araman can publico,
Para sinda maka-biristo, mapadusahan, asin makaharali sa puesto!

Sinda an mga malalansang kuhol na padagos nag-iib-ib can judicatura.
Na dapat puro-roton, ronoton, asin i-apon sa nagbabagang basura!
Sinda an mga anay na padagos na
minara-ot sa satuyang sosyodad.
Na dapat makawarara, para magdanay an tranquilong comunidad.