Camarines Sur hot spot sa rebeldeng NPA
Kadakli kan mga barangay sa Camarines Sur nasa “hot spot” kan CPP/NPA,
posibleng iyo naman ini an himuntahon kan mga rebeldeng NPA
matapos kan nangyaring encuendro sa Matnog, Sorsogon. Si Ka Roger
Rosal mismo an nagpatanid na malansar sinda nin mga ofensiva
contra sa tropa kan gobierno nganing mapaheling sa puesto si GMA.
Si Sr. Supt. Romeo Mapalo, PNP Provincial Director sa Camarines
Sur nagpahayag sa miembros kan media na nagpatanid siya sa mga
jefe de policia na dai maging “relax” sa saindang trabajo orog na
sa mga kalaban kan gobierno.
Igwa nang enot na pambabadil gadan nin polis sa Libmanan, Cuidad
nin Naga asin an pinkahuri iyo an pan-aatake sa Sub-Station kan
Bato Municipal Police Station sa Barangay San Miguel na nagresulta
sa pagkakagadan kan duwang miembros kan policia asin saro an iredo.
Matapos kan ceasefire kan Enero 1, 2006, liwat niyang pig-alerto
an mga police station sa 35ng munipios asin duwang cuidades kan
Naga asin Iriga. Parating target kan mga rebeldeng NPA iyo an mga
detachment, alagad kaipuhan dai man giraray magpabaya an mga
police station.
Dawa na ngani pigsasabi kan NDF na misencounter an nagyari sa
Matnog, Sorsogon mantenido kan PNP Camarines Sur na maging
marigmat sa mga kalaban kan gobierno orog na kun alanganin sa oras.
Sa Naga City Police, si P/Supt. Ramon Ranara, jefe de policia
digdi nag-andam na kan saiyang reforma sa laog kan jepatura na
saiyang ipapasunod ngonian na taon, kabali na an pagmantenir kan
Mobile Sub-Police Station na madonar nin sarong vehiculo an local
na gobierno klan cuidad.
An policia kan cuidad haloy nang kulang nin miembros kan PNP, igwa
nin ibang estratehia an ipapasunod ni Ranara kabali an pagpaluwas
na kan ibang miembros kan jepatura para idestino sa pagpatrolia.
Si piglalaoman na 20ng dagdag na polis na pigpangako ni Bicol PNP
Chief Victor Boco, dai na-realisar sagcod sana sa pito an
pigpadarang bagong polis antes kan pasko.
