ISYU SA PLAZA RIZAL
Gobierno provincial pigcondenar kan SP
Premirong aldaw kan session regular kan Sanggunian Panlunsod kan
Cuidad nin Naga sa bagong taon 2006, sainda tolos na pigcondenar
an gobierno provincial kan Camarines sur sa pamamayo ni Gobierno
L-Ray Villafuerte huli kan abusong pagpaarkila kan Plaza Rizal sa
tiange envez na tawan nin prioridad si celebracion kan Rizal Day
kan Deciembre 30.
(Photo
Caption)
Si
Consejal John Bongat (naka-tindog) nagpapaliwanag ki bise alcalde
Gabby Bordado, presiding officer kan Sanggunian Panlungsod sa
pagpadreno kan resolucion na minacondenar sa padagos na pagtugot
kan gobierno provincial na palibotan nin tiange an monumento ni
Dr. Jose Rizal sa centro kan Ciudad nin Naga.
An resolucion na inaprovaran kan session kan Enero 2, 2006
pigpadrenohan ni Consejal John Bongat asin nagging joint and
collection an motion kan mga presenting consejales sa session na
kinababalihan ninda Esteban abonal, Lourdes Asence, William Del
Rosario, Salvador del Castillo, Jose Grageda asin Allen Reodanga.
Si bise alcalde Gabriel H. Bordado , Jr. presiding officer nagsabi
na an Plaza Rizal yaon sa ngonian sa supervicion kan gobierno
provincial nakakasupog sa mga visita kan Cuidad nin Naga huli ta
apesar na yaon digdi an monumento ni Rizal an satong herwe
nacional ginibo pang saodan.
Insulto sa Filipino asin kawaran nin respeto ki Rizal an padagos
na pagtugot kan capitolio provincial na ipa-ocupar sa mga tiange
an Plaza Rizal, sabi pa ni Bongat.
Pigbuyagyag kan bise alcalde na si mga miembros kan Knights of
Rizal na si programa kan Rizal Day kan Deciembre 30, 2005 envez na
gibohon sa Plaza Rizal sa centro kan ciudad an mga actividades dai
man makabuelo huli ta ocupado nin mga paratienda dai na ngani
lamang nabugtakan nin burak an monumento.
An nangyari si mga programa ginibo na sana sa compound kan City
Hall na pig-atendiran kan mga oficiales local, oficiales de
barangay, Knights of Rizal asin iba pang sector.
Inapodan kan City Hall an gobierno provincial na dai paarkilahan
sa mga tiange an Plaza nganing tawan nin prioridad an celebracion
kan aniversario kan pagbadila si Dr. Jose Rizal kan Deciembre 30,
1896 sa Baumbayan, Luneta.
An jurisdiccion sa pagmanijar kan Plaza enot nang ginana sa RTC
afavor sa City Hall alagad pig-apelar pa kan gobierno provincial
sagcod na nag-arabotan pa sa Corte Suprema. Sagcod na pendiente pa
an caso padagos pang nasa supervicion ka provincial.
Mientras tanto, sa kaparejong session regular pinasar sa
collective motion an resolucion na nagpapagirumdom sa Naga City
Police Station sa pamamayo ni Chief of Police Ramon Ranara na
estrictong implementer an ordenansa contra sa mga magkakadarakop
sa sugal na jueteng.
An ilegal na actividad na ini liwat naman nabuhay sa Camarines Sur
na mayong ginigibong accion si PNP Provincial Director Romeo
Mapalo. Sagcod lang siya sa patanid na iimplementar an “one strike
policy” dai man narerealisar.
