Jueteng sa Camarines Norte, papakusogon
DAET,
Camarines Norte - Mahiwas na an colleccion kan ilegal na sugal na
jueteng sa Camarines Norte, alagad pinahimotikan ni PNP Prov’l.
Director P/Sr. Supt. Efren Yebra an operacion kan sinambit na
sugal. Igwa nang correador sa jueteng sa Sta. Elena na nagpoon kan
pagcolecta kan bulan nin Deciembre 2005.
An report kan policia kan Sta. Elena, pigtutukdo na an mga
correador gikan pa sa provincia kan Quezon na lakop an sinambit na
sugal sa kaparejong provincia. An iba man na residentes dai man
tiwala sa paliwanag kan PNP huli ta an correador bestadong gikan
sa mga barangay kan Sta. Elena kun igwa man hali sa Quezon si
empleados kan capitalista. Maging an mga oficiales local kan Sta.
Elena nagpapahimotik kan mga informacion na an bola kan sugal
ginigibo sa saindang banwaan. Pigsasahot na an mga jueteng
collector hali sa Quezon mientras na nasa linderos an saindang
banwaan sa sinambit na provincia.
An informacion nagpapahayag na posibleng maging centralisado na an
sinambit na sugal sa Camarines Norte ngonian na bulan.
Nagkapera man sana sa mga lideres local nagsabi na dai magdadanay
an ilegal na actividad kun mayong proteccion sa mga oficial kan
PNP asin politico. (Francis Elevado)
