Duwa sa apat na electric cooperative (EC) sa Camarines Sur an papadalaganon na kan privadong corporacion matapos kan ginibong subasta kan Julio 5, 2006 sa oficina kan Energy Regulatory Commission (ERC) sa Manila na an declarado nang gana iyo an Salcon Power Corporation (SPC) sa saro sanang karibal sa subasta an Asia Philippine Corporation.
An Casureco I na may oficina sa Libmanan, asin Casureco IV sa Tigaon, parejo kan provincia nin Camarines Sur an malaog na sa Investment Management Contract (IMC) asin ini ma-efecto matapos kan duwang bulan na pagfinalisar kan mga terms and condition sa contrata sa laog nin 15 anyos.
Kabali sa mga condiciones iyo an pag-asegurar na dai basang mapa-implementar nin aumento sa singil sa tarifa sagcod na mayo nin mga public hearing na dapat mag-agi sa proceso kan ERC antes aprovaran an pagpalangkaw kan tarifa.
An SPC nag-opresir nin arkila sa Casureco I nin 5.25 por ciento sa gross income cada bulan mientras na sa Casureco IV hababa sa 5.25 por ciento kan gross income cada bulan na babayadan quarterly.
Sa enot na duwang taon kun mayo pa nin ingreso an kabayadan na arkila sa sinambit na mga EC puedeng igilid muna envez sa masunod nang taon, alagad magiging utang si enot na duwang taon na obligado man giraray na magbayad susog sa kasundoan.
Nag-atendir sa subasta sa lado kan Casureco I iyo sinda: GM Francisco Quinones, mga director Erwin Dilanco, Eliseo Promis, Isidro Villareco, Edgar Cancaida asin Miguel Cada. Sa Casureco IV si Managing Consultant OIC GM Veronica Briones, Board President Arnel Armea asin an completong miembros kan junta directiva asin presenti man an representante kan obreros sa duwang EC.
Mas halangkaw an lease contract sa Casureco I huli ta mahiwas an coverage area sakop an mga banwaan kan premirong distrito kan Camarines Sur kun icocomparar sa Casureco IV na sakop an mga banwaan kan tercer distrito, dai na kabali an Siruma, asin Tinambac.
An Castalla iyo an consultant kan Department of Energy na haloy nag-adal kan mga nalulugi nang EC asin an solucion maglaog na sa IMC.
Dawa nga ngani kapot na kan privadong corporacion an sinambit na ECs, alagad an mga miembros kan junta directiva magiging watch dog sa operacion kan bagong manijamiento.
Nagpapadagos an pag-funcionar kan mga director na may mga representante cada distrito. Kun an SPC mag-utang sa bangko nin P5 milliones para sa ano man na programa sa laog kan cooperativa dai ini tutugotan sagcod na mayo nin pag-tugot an junta. Puedeng dai na paki-araman an saindang loan transaction kun sagcod sana sa P3 milliones.
Mientras tanto, si GM Quinones puedeng maglawig sa oficina sa laog nin anom na bulan asin si pitong mga department head an gigibohon na sanang tulong departmento.
An bagong manijamiento pigtawan nin poder na magbalasa kan mga empleados defende sa saindang calificaciones.
An National Electrification Administration (NEA) na dating mahelig magpaki-aram sa pagpadalagan kan EC magiging na sanang supervision an saindang papel asin an nakakasakop sa sainda iyo ERC.
