CIUDAD nin Legaspi - An Regional Tripartite Wages and Productivity Board (RTWPB) Bicol ina-provaran na an P11.00 na wage increase sa aldiang sueldo sa anom na provincias asin pitong ciudades kan rehiyon.
An Kilusan Mayo Uno (KMU) asin iba pang union obreros dai na nagsumiter nin peticion para sa wage increase huli ta disganado sa RTWPB na parating pabor sa kagustuhan kan privadong sector. Saindang pighahalat an P125 na legislative act na pendiente sa congreso na aprovado na sa committee level.
An RTWPB nagdecicion na sa paagi kan motio propio nagpadagos kan mga consultacion sa dagdag na sueldo base sa na enot na directiva ni dating DOLE Secretary Patricia Sto. Tomas na adalan an pagpasunod nin bagong wage order huli kan padagos na paglangkaw kan mga mayor na producto asin flete sa pampasajerong sasakyan.
An wage increase puedeng mag-efecto sa Agosto 15, 2006, alagad ini ma-efecto sana pakatapos kan 15 dias na ipublicar sa periodico local na nag-cicircular sa rehiyon. An daily minimum wage sa Bicol nagsakat na sa P209 hali sa dating P194.00.
An sector nin obreros, disganado sa bagong ipapaluwas na Wage Order No. 11 mientras na kulang pa ngani sa pam-flete sa jeepney kaya sa mga consultacion sa anom na provincia mga 10 por ciento na sana gikan sa sinambit na sector an nag-aatendir huli ta aram na an magiging decicion apabor sa privadong sector.
Si Jose Dizon asin Ludovico Ravis, mga representantes kan sector nin obreros sa Wage Board saindang pighurot an P45.00 na wage increase, tulos pigcontra kan mga employer sa dahilan na sinda malulugi sagcod na nagpatanid na maresulta sa paghaklas asin pagsara kan saindang establisimiento.
An dugang na sueldo mas hababa sa Wage Order No. 10 na cantidad 15 pesos sa Cost of Living Allowance (COLA).
An deliveracion nagpoon kan Lunes (Julio 17) natapos ala 1:00 nin aga kan Martes, alagad pigpaliwanag ni Dizon na si Wage Order No. 10 na dagdag na P15.00 sa COLA an pigsalamog na sa sa basic salary kaparejo kan ipapaluwas na Wage Order No. 11. Pabor sa obreros an pagsalamog sa wage rate huli ta makakatabang sa mga dagdag benificio kabali sa mga Christmas bunos, SSS sagcod nang pagretiro sa servicio.
Sa mag-agang deliveracion an lado kan govierno pigtulod na sararoon na sana an wage hike kan tulong categoria na si dating enot na categoria na kinababalihan kan ciudades kan Naga, Legaspi, iparejas na an wage rate kan ika-duwa asin ika-tulong categoria arog kan mga banwaan kan Pili, Daraga, Iriga asin Tabaco asin iba pang mga lugar.
Kan magtugot sa pag-restracture an mga miembros kan junta an nagka-igwa nin dagdag na biyaya iyo an nasa category II kan mga banwaan kan Pili, Camarines Sur, Daraga, Albay Ciudades kan Iriga asin Tabaco. Afuera kan P11.00 magkaka-igwa pa sinda nin dugang na P7.00 mientras na pigsabay na sinda sa category 1 na pigpasunod an P15 na wage increase susog sa Wage Order No. 10. Magiging P18.00 an saindang wage increase.
Alagad dai man tulos i-implementar an P7.00 huli ta ini itatao an enot na P3.50 sa Febrero 2007 asin an sunod na P3.50 sa Mayo 2007.
Sa mga consultacion, pigbuyagyag ni NEDA director Romeo Escandor na 30 por ciento sana kan mga employer sa rehiyon Bicol an nakaka-implementar kan Wage Order na pig-approvaran kan RTWPB. Ini nasa pag-monitor na kan DOLE alagad sagcod sana sa pagsabing nag-coconducir nin inspeccion sa mga compania mayo man nangyayari.
An Wage Board Bicol componido ninda; director Alex Maranan kan DOLE Bicol na iyo an chairman, an mga vice chairman sinda NEDA director Romeo Escandor asin Jocelyn Blanco kan DTI, sa privadong sector si Marcelo Tan asin Antonio Concepion asin sa labor sector sinda Jose Dizon asin Ludivico Ravis.
