SARONG organisadong grupo nin mga hold-upper na componido nin activo asin dating miembros kan Civilian Armed Forces Geographical Unit (CAFGU) iyo an principal na suspechado kan mga jefe de policia sa premirong distrito kan Camarines Sur na nagpapasakit sa mga negociantes digdi sa laog na nin nagkaperang bulan.
An pinakahuring incidente iyo an apat nang veces sa laog sana kan presenting bulan na kadakli nangyari sa Maharlika Highway sa Libmanan na kabali digdi iyo an gasoline station.
Si P/Inspector Joel Guerero, jefe de policia kan Libmanan Municipal Police Station nagsabi sa Bicol Mail na an operacion kan mga hold-upper mga naka-bonnet alagad igwa nang nabisto sa sainda na dating miembros kan Cafgu asin an lider pigtutubodan na activo pa sa servicio.
Igwa nang nadakop na suspechado an Philippine Army sa provinci nin Quezon na activong miembro kan CAFGU na armado nin calibre 45 asin igwa pang halabang armas an padagos nang pig-iinvestigaran kan ma-arestar kan Martes (Julio 25), na dai pa pigngaranan.
Igwa nang ginibong coordinacion an mga jefe de policia sa mga banwaan kan Del Gallego, Ragay, Sipocot, Libmanan, Pamplona, Pasacao, Cabusao asin San Fernando sa pag-alerto laban sa mga suspechado, sabi pa ni Guerero.
An sinambit na mga banwaan haros piglaog na kan mga hold-upper asin igwang “local boys” cada municipio na iyo an contact kan mga suspechado sagcod natalaan kun siisay an isusunod na victimahon.
Sa 9th Infantry Division kan Philippine Army na may base sa Camp Elias Angeles Pili, Camarines Sur, si Col. Florante Isles oficial na parapahayag kan militar sa Camarines Sur sinabi kaini na saindang ipapa-investigar an mga sahot na suspechado sa mga robbery hold-up sa provincia iyo an nagkaperang miembros kan Cafgu asin igwa pang dating miembros. An siisay man na maprovar na nagpasaway dapat mag-atubang nin castigo sagcod na sangatan nin caso sa corte, sabi pa ni Isles.
An mga miembros kan CAFGU nasa supervision kan Philippine army.
Si Provincial Director Sr. Supt. Romeo Mapalo nagcrear na kan Task Force Robbery Hold-up na pinamamayohan ni P/Supt. Jack Silahi. Kasuodma nag-conferencia na sa PNP provincial office kan saindang mga accion asin investigacion sa mga pananalakat na an target pati na an sadit na restaurant sa mga highway, gasoline station asin iba pang mga negociantes.
Sa apat nang sunod-sunod na mga pananalakat sa Libmanan, Camarines Sur an duwang victima na sinda Willy Rili asin Joel Royales kan Pag-uring sa banwan na ini an madali nang maresolveran an caso mientras na nakatalaan nang isangat an caso criminal sa corte contra sa suspechado na dating miembros kan Cafgu.
An grupo nahanap nin buelong oras asin pakatapos nadurolag sanang naglalakaw na may sukbit nin mga armas asin igwa may dara pa nin M-16 armalite. Mayo man sinda nin darang gate away vehicle. Ngalas man an mga residentes huli ta apesar may detachment an Philippine Army sa Brgy. San Isidro, Libmanan dai lamang nasusubay-bayan an armadong hold-upper.
Magigirumduman kan mga bulan nin Enero asin Febrero 2006 nagka-igwa man nin nagkaperang mga caso nin mga pananalakat sa mga negociantes na yaon sa gilid kan Maharlika Highway sagcod na nakaka-abot an operacion sa mga banwaan kan Libmanan, Sipocot asin Cabusao.
Alagad naglaylo an mga robbery-hold-up kan madakop an grupo ni Martin Aguila y Cumpas, Adriano Aretana asin Randy Dela Cruz kan Febrero 18, 2006 sa sarong restaurant sa San Fernando.
Sinda kinasohan nin robbery, hold-up asin illegal possesion of firearms na sagcod sa ngonian anas nalalaom sa carcel an sinambit na mga suspechado. Sinda may mga caso sa Libmanan, San Fernando asin Cabusao.
