PILI, Camarines Sur - An 9th Infantry Division kan Philippine Army sa Bicol na may base sa Camp Elias Angeles sa banwaan na ini kabali sa tulong rehiyon sa Luzon na maconcentrar sa paglaban sa insurgencia nganing taposon na sa laog nin duwang taon an halawig na decada kan CPP/NPA susog sa orden ni Presidente Gloria Macapagal-Arroyo.

MAABRASA O MASALUDO - Si Lt. Gen. Hermogenes C. Esperon Jr., (sa tahaw) Commandang General kan Philippine Army napahuyom ki maretiro nang Major Gen. Ricardo Nobleza (sa wala) asin ki BGen. Napoleon B. Malana (sa to-o) sa pag-agawan kun maabrasa asin masaludo. Si Malana iyo na an General Officer In-Charge kan 91D karibay ni Nobleza na maretiro na sa servicio sa mansunod na bulan.

        Si Lt. General Hermogenes C. Esperon, Jr., AFP nagpahayag sa mga miembros kan media sa Camarines Sur na sa tulong mga battalion nin militar gikan sa Mindanao an saro pigdestino sa 9th ID nganing i-andam sa paglaban sa problema sa insurgencia sa Bicol na dapat surodon asin taposon sa laog nin duwang taon asta sa 2010.

        An Bicol, Central Luzon asin Southern Tagalog iyo an pilot areas kan gobierno sa pag-guiera contra sa mga rebeldeng NPA.

        Si Esperon, naging juespe de honor sa ginibong turn-over of command ceremony kan Julio 30, 2006 sa 9th ID hali ki maretirong Major Gen. Ricardo Nobleza pasiring ki BGen. Napoleon B. Malana na pig-designar bilang General Officer-In-Charge kan sinambit na division.

        An NDF Bicol sa paagi ni Ka Greg Banares, nagsabi na andam nindang sabaton an pigsasabi ni GMA na all out war contra sa NPA. Igwa naman sindang mga plano sa mga operacion kan militar asin PNP.

        Pigtuyaw ninda an P1Billion na fondo ni GMA ngani sanang taposon an insurgencia, bako ni an solucion sa paagi nin armas asin bala envez an pagpadagos kan peace talk.

        Igwa na nin limang battalion kan mga soldados kan gobierno an Bicol asin ini nakatalaan pang dungangan tanganing iwarak sa iba pang mga provincias kan kabikolan na mga tataghan pa kan NPA.

        An rebeldeng NPA saro pang homa sa seguridad sa nacion sagcod inapod niya na terrorista na nagpapadagos pa kan saindang ilegal na coleccion kan revolutionary tax, sabi pa ni Espiron.

        Pinahayag man ni Malana na an saindang guiera contra sa mga NPA kaipuhan an suporta kan namamanuan nganing taposon sa pigtalaan na plano ni PGMA sa laog nin duwang taon.

        Si mga programa ni Nobleza saiya giraray na ipapadagos mientras na nagdagdag pa sinda nin sarong battalion nin Phil. Army na hali sa Mindanao.

        An bagong pamayo kan 9th ID dating hali sa 6th Infantry Division kan Philippine Army sa Mindanao asin tubong Cotabato City.

        Pig-ayon an Bicol bilang pilot areas laban sa mga kumunista huli ta makusog an presencia kan mga rebeldeng NPA digdi sa rehiyon kabali an Camarines Sur, Sorsogon asin Albay.

        Mientras tanto, nagpatanid pa si Esperon na accion legal an saindang gigibohon sa mga negociantes na padagos pang nagsusuporta sa CPP/NPA. Alagad preparado man an militar na magtao nin seguridad sa mga negociantes na may patanid an NPA na igwang mangyayari kun dai macooperar sa pagbayad nin revolutionary tax.