AN Peace and order Council (POC) kan City Hall na-aalarma na kan mga darakulang caso sa pagbalga kan Republic Act 9165 o an Comprehensive Dangerous Drugs Act of 2002 na nahuhulog sana sa entonsis huli sa tecnicalidad binabasura kan corte an caso.
REGULAR NA MITING KAN POC. Si Alcalde Jesse M. Robredo (naka-tindog sa atubangan kan rustrom) nagbuyagyag na ipapadagos an pagtao kan performance incentive sa mga miembros kan Naga City Police. Alagad mapaluwas nin guideline sa pagtao kan incentivo susog sa kahagadan man sana kan policia na an dapat makinabang si nagtratrabajo kan saindang obligacion asin marhay na “performance.”
Sa suhay na entrevista kan Bicol Mail maging si OIC Chief of Police Senior Inspector Roger Medalla nagconfirmar na na-aalarma na siya kan caso sa droga asin ini ngonian an saiyang tatawan nin prioridad huli ta an problema sa droga an 80 por ciento kan mga criminalidad nangyayari huli kan pag-usar kan pinapangalad na bulong.
Kay Mayo 5, 2005 liwat naman nakaarestar an policia nin sarong suspechadong drug pusher na pigbistong si Gerry Puncia kan Sitio Kaimito, Barangay Dayangdang, Ciudad nin Naga. Nasamsam sa saiya an 04 na gramos nin shabu asin sinangatan nang caso sa pagbalga kan RA 9165.
Si NBI Director Ricardo Diaz, dai palang nahahaloy nadestino digdi sa Bicol an nagpahayag sa POC meeting na may problema an ciudad sa naglalangkaw na caso sa droga, alagad dai muna niya pigdetalye mientras na igwa na sindang ginigibong investigacion.
Sa miting kan POC kan Martes (Mayo 30) na hapon sa session hall kan Sangunian Panlungsod na an presiding officer si bise alcalde Gabby Bordado saro sa caso na natukar iyo an pagkakabasura sa corte kan caso contra ki Robert Chiu y Camacho kan Barangay Calaug, Ciudad nin Naga. An isyu huli sa technicalidad kan pag-presentar nin mga evidencia kan Naga City Police. Naarestar si Chiu kan Enero 5, 2006 mientras na may bitbit nin search warrant an mga awtoridad hali sa corte.
Naghinayang an POC huli ta 206 na gramos nin shabu an nasamsam sa suspechado sagcod nag-atubang nin caso sa pagbalga kan Republic Act 9165. Inako ni Medalla na si Chiu yaon sa saindang listahan na nagtutulak asin naggagamit nin shabu.
An ika-duwang caso sa pagbalga kan RA 9165 sa city prosecution pa sana pigbasura na iyo an pagkaka-arestar kan Marzo 27, 2006 sa paagi nin search warrant ki Sidamin Sangcalan y Dimaporo asin an saiyang live-in partner na si Jessica Galangue y Peleño a.ka. Jecjec. Nasamsam sa sainda an 4.5 gramos nin shabu asin iba pang mga paraphernalla.
Si Alcalde Jesse M. Robredo na nag-atendir sa POC meeting nagsabi na sa saindang orolay sa mga miembros kan PNP mabugtak nin abogado an City Hall na matabang sa mga awtoridad sa pagcompleto kan mga evidencia nganing maseguro na dai masasayang an kapagalan sa pagdakok kan mga envuelto sa droga asin mapaangat an saindang moral. Ini afuera pa kan saiyang pighagad na magdestino nin inquest fiscal sa policia.
Sa POC meeting nagpasar nin resolucion na naghahagad nin tabang sa NBI Bicol na ma-investigar sa nangyaring pagkakabasura kan caso sa droga contra ki Chiu.
Sa entrevista kan Bicol Mail ki City Prosecutor Romeo Tayo, sinabi kaini na an mga experiencia sa saiyang oficina kun igwang caso sa droga minsan an proceso kan pag-arestar may dikit na problema.
Dinagdag pa ni Tayo an proceso kan pagkoa nin evidencia may problema, an evidenciang nakoa puedeng dai ma-ako kan corte laban sa persona na pig-arestar na saro sa pigtaong halimbawa iyo an pag-arestar ki Sangacalan asin asin saiyang live-in partner na si Galangue sa Concepcion Pequeña, Ciudad nin Naga.
Si NBI Director Diaz na presente sa POC meeting pig-alok an mga oficiales local asin an POC na magtarabangan sinda na magpadreno nin seminar sa pag-arestar asin pagsangat nin caso sa illegal na droga. Ma-invitar sinda nin mga resource person hali sa central office kan NBI na experto sa pagsangat nin caso sa droga.
Sa Naga City Police, si OIC COP Roger Medalla nagsabi na sa cada semanal na conferencia ninda mahagad sinda nin tabang sa City Prosecution Office nganing matukdoan nin dagdag na mga estratihia nganing an caso sa RA 9165 segurohon na mafifinaran an mga acusado.
