“KAPINUNAN pa sana laban sa droga”. Ini an mga pahayag ni NBI Regional Director Ricardo “Ric” Diaz matapos kan ginibong pagsakyada kasuodma kan pinagsarong fuersa kan NBI Manila, NBI Legaspi City, PDEA asin kan oficina regional kan NBI Bicol sa tulong mga tataghan nin mga suspechadong drug pusher sa Ciudad nin Naga asin saro sa Bombon, Camarines Sur. AN victima nin pang-gagadan asin iba pang heinous crime sa Ciudad nin Naga asin sa iba pang provincias kan kabikolan makakalaom pa nin justicia dawa an agraviado dai magsangat nin caso criminal sa corte.

Photo Caption: DAKOP KA - Mga evidencia na nasamsam kan mga elementos kan NBI, PDEA sa residencia ni Ronaldo “Nadnad” Abagat kan Dimasalang, Sta. Cruz, Ciudad nin Naga na kinababalihan kan mini camera, mga bala kan calibre 45ng badil, shabu sa limang pidasong sachet asin iba pang mga paraphernilla. Sa retrato mga elementos kan NBI Naga asin Manila pig-iinvestigaran an suspechado sa pagsaray nin droga na si Melvin Abagat, tugang ni “Nadnad” na at large kan ginibong operacion kan mga awtoridad.

        An operacion na ini laban sa droga resulta man sa kahagadan ni Alcalde Jesse M. Robredo na kaipuhan an tabang kan NBI sa problema sa droga sa ciudad. Sa isyu kan Bicol Mail kan Junio 01, 2006 sa bicol section banner story an “POC NA-AALARMA NA SA MGA CASO SA DROGA”, tabang kan NBI hinagad.

        Sarabay an ginibong magkasuhay na operacion pasado alas 6:00 nin aga kan mga elementos kan NBI asin PDEA, kaibahan an ibang mga oficiales de barangay asin prensa bilang testigos. An mga suspechado na naarestar pigbisto ni Diaz na sinda Marita Abagat sa Bombon, Camarines Sur; residencia kan saiyang aki na si Ronaldo “Nadnad” Abagat na dai inabotan envez an saiyang tugang na si Melvin Abagat sa Sitio Dimasalang kan barangay Sta. Cruz; Brgy. Capitan Raoul Rosales sa saiyang residencia sa Brgy. Balatas asin siya under arrest mientras na an suspechadong drug lord na tugang kaining si Victor Rosales alias Ching Lo an dai na inabotan sa saindang residencia; asin Jaime “Kupsit” Verdejo, taohan soboot ni Ching Lo nadakop sa tataghan kaini sa Brgy. Cararayan, gabos kan Ciudad nin Naga.

        Mga 70ng miembros kan raiding team an nakasamsam nin mga sachet nin shabu asin iba pang paraphernalla alagad dai pa nadeterminaran kun perang gramos sagcod kasuodma mientras na pig-aandam an caso sa inquest fiscal sa pagbalga kan RA 9165 o an mapadapit sa Comprehensive Dangerous Drug Act of 2002.

        Sa inicial na informacion an residencia ni Abagat sa Bombon, nasamsaman nin limang sachet nin shabu, apat na sachet nin shabu sa residencia kan saiyang aki na si Nadnad sa Dimasalang, Sta. Cruz, Ciudad nin Naga asin anom na sachet nin shabu sa residencia ninda Brgy. Capitan Rosales asin saiyang tugang na si Ching Lo.

        Hi-tech an tataghan kan mga suspechadong drug pusher huli ta igwa nin mini camera na ginagamit sa pag-monitor kan mga naglalaog na tao sa saindang residencia asin naaaraman tulos kun igang masakyadang awtoridad.

        Sinda Nadnad asin Ching Lo na mga at large an kabali sa sinangatan nin caso sa ilegal na droga.

        An NBI nagkoa nin search warrant sa corte sa Manila na iyo an bitbit na armas nganing sakyadahon an sinambit na mga tataghan nin mga dorogista sa Ciudad nin Naga asin Bombon.

        Pigpaliwanag ni Diaz na an Corte Suprema awtorisado an NBI na dawa sain na lugar puedeng maghagad nin search warrant sa executive judge nganing magamit na armas sa pagsamsam kan mga ilegal na droga aisn pag-arestar kan mga enveulto sa sinambit na ilegal na actividad.