PILI, Camarines Sur - Nakaguno nin suporta an mga militanteng grupo sa mga miembros kan Sanggunian Panlalawigan (SP) kan Camarines Sur na kaalyado ni Presidente Gloria Macapagal-Arroyo sa partido political kan magpasar nin resolution na na-cocondenar kan mga nangyayaring extra judicial killings na nagsakat na sa 37 an victima digdi sa povincia mientras na igwa nang total na 91 sa Bicol.

        Naging collective an resolucion na pinangenotan ni Vocal Waren Señar tanganing ipaheling kan Sanggunian Panlalawigan kan Camarines Sur an saindang bilog na suporta sa pagcondenar kan mga militante sa nagpapadagos na mga political killing digdi sa provincia asin nangyayari man sa manlaen-laen na rehiyon.

        Pagprotehir sa saindang deretso humano kaya sararo an mga miembros kan SP contra sa political killing.

        An session regular kan Martes (Junio 27) kan SP vinisita kan mga militante matapos kan saindang caravan sa Ciudad nin Naga na nagdedenuncia ki PGMA kan mga nangyayaring political killing sa saiyang administracion.

        Saindang pig-aacusar na militar man sana an suspechado sa mga panlilikidar sa mga lideres kan saindang organisacion na bestadong contra sa administracion na langtadan an pangapodan na dapat magdemiter na sa puesto si GMA huli ta bako man na ligitimong Presidente kan nacion.

        Sa ngonian sa pinakahuring bilang nag-sakat na sa 670 an mga victima sa bilog na nacion, alagad dai man nareresolveran an mga caso kaya ngani saindang pig-aacusaran an miembros man sana kan awtoridad an suspechado sa sinambit na caso.

        Sa ika-duwang impeachment case na pigsangat sa Camara-Baja contra ki PGMA kabali sa mga acusacion iyo an mga nangyayaring political killing na may sisimbagon an administracion.

        An Caravan pinangenotan ni Jariz S. Vida, secretary general kan Bayan Muna sa Camarines Sur, yaon an grupo kan Peoples’ Organization Task Force Karapatan asin iba pang mga lideres kan militante asin kan saindang mga miembros.

        Antes nagpasiring sa SP Camarines Sur nag-atubang sa grupo ni Vida sa pamayo kan oficina kan Commission on Human Rights CHR) sa Ciudad nin Naga na naghahagad nin tabang na ma-investigaran an mga caso sa pagkakabadil gadan kan saindang mga pag-iriba.

        Sinda magpapadagos sa pag-protesta sagcod na dai natatawan nin justicia an pagkakalikidar kan saindang mga pag-iriba.