AN victima nin pang-gagadan asin iba pang heinous crime sa Ciudad nin Naga asin sa iba pang provincias kan kabikolan makakalaom pa nin justicia dawa an agraviado dai magsangat nin caso criminal sa corte.
Ini an initiativo kan NBI na mapadagos sa investigacion kan caso dawa an afectadong familia dai na magpadagos sa pagplantiar nin caso sagcod na bubuhayon an nagturog na investigacion sa nagkaperang caso nin pang-gagadan.
Photo Caption: Si NBI Director Ricardo Diaz, pigbuyagyag sa Naga City Peace and Order Council meeting an mga pangaran kan victima nin pang-gagadan na sagcod sa ngonian dai pa nareresolver.
Si Atty. Ricardo “Ric” Diaz, regional director kan NBI Bicol nagsabi sa Bicol Mail na sinda awtorisado na ipadagos an investigacion susog sa Acta Republica 157 maski na mayo pa an nagrereclamo huli ta dai na interesado isangat an caso sa jusgado.
An RA 157 an ley na nagcrear kan NBI na puedeng mag-investigar dawa mayo nin an complainant sa paagi kan “moto propio” sinda magpapadagos sa pagsiasat.
Nagngalas si Diaz na igwang mga pendienteng caso sa NBI an dai naresolveran sa dahilan na mayo na si nagrereclamo na dai na pigpadagos an caso nganing maarestar an mga suspechado.
Alagad sa saiyang liderato bakong importante an familia huli ta marayo man sa incidente kan crimen, ginadan bako man sa harong envez sa luwas kaya sinda sa NBI asin PNP obligado na ipadagos an investigacion.
An tunay na agraviado iyo an “People of the Philippines” kaya sinda sa awtoridad iyo an masangat nin caso criminal, sabi pa ni Diaz.
Sa ngonian an nasa listahan kan NBI na dai nareresolveran an mga caso nin pang-gagadan iyo an mga victimang sinda; William de Leon, contratista; Jesus Bulaong, oficial kan PCA; Sora Singh, envuelto sa 5-6 na pagpa-utang na Bombay; SPO3 Casiano “Sonny” Parumog, ini nabayaan na caso kan taon 2005 asin an pinakahuri si Prospero Botor, sarong contratista binadil gadan harani sa saindang residencia sa brgy. Triangulo kan nagtalikod na bulan.
Sa POC meeting hinagad na an tabang kan NBI sa pag-investigar kan mga nagtuturog na casong pang-gagadan kabali na an pag-investigar sa pagkakabasura kan caso sa ilegal na droga contra ki Robert Chiu y Camacho na nasamsaman nin 206 na gramos nin shabu.
Mientras tanto, dinagdag pa kan NBI na maging si menor de edad na victima nin pang-aabuso asin pinabayaan na kan magurang sa pagplantiar nin caso laban sa suspechado ini saindang puedeng ipadagos asin isangat an caso.
An doctrina kan “parent patria” an estado iyo an magiging magurang na an NBI iyo an masangat nin caso sa corte contra sa suspechado.
