Consejal "namamangka
sa dalawang ilog"
CIUDAD
nin Iriga - Daing pag-alangan na inako ni Consejal Sonny
Magistrado, Chairman kan Committee on Infrastructure asin Land Use
kan Sanggunian Panglungsod (SPI) sa Ciudad na ini na sinda totoong
“namamangka sa dalawang ilog” sa paglapigot nindang maka-utang nin
100 miliones pesos nganing gastoson sa nagkapirang “priority
projects” kan local na gobierno ngonian na 2006.
Ini katakod kan linaogan na na transaccion kan ciudad sa China
Shenyang International Economic and Technical Corporation sa
pag-utang kan sinambit na cantidad apesar na igua na nin naenot na
kabaing na negosacion an LGU-Iriga sa Land Bank of the Philippines
kan naka-aguing bulan.
Tinawan doon ni Magistrado na mayo man maraot o pigbabayolar
sindang ley kan aprovecharan ninda an pig-oofrecir na pautang kan
Shenyang mantang dakulang bagay asin pakinabang sa Ciudad an 3%
interest rate kaini kun icocomparar sa 10.5% kan Land Bank sa
pagbayad nin uutangon cada taon.
Alagad maski ngani clarong maray an diferencia sa interest rate,
si Magistrado nagsabi na dai pa man ninda pigtuwadan an
application sa Land Bank nin huli ta dai pa man sinda cierto kun
mangyayari an pag-utang ninda sa Shenyang.
Maroromdoman na an SP nagpasar nin resolucion kan tuminalikod na
bulan sa katuyuhan na tawan nin awtorisacion si Mayor Madelaine
Alfelor-Gazmen na makipag-negociar sa Land Bank para sa P100
million pesos loan” na gagamiton sa construccion kan bagong
government center asin Central Business District II sa ciudad na
ini.
Pigbuyagyag pa ni Magistrado na an paglaog sa eksena kan Shenyang
susug sa recomendacion ni Deputado Felix Alfelor, Jr. An local na
gobierno nagpadara na nin Letter of Intent sa Shenyang na tolos
man sinimbag kaini kan naka-aguing Pebrero 4.
Apuera kan mga papeles na dapat isometer, an loan kan LGU-Iriga
kaipuhan pa nin bendicion hali sa oficina ni PGMA o an pig-aapod
na “Sovereign Guarantee.” (Romeo Olea)
