---

Fekeng atleta dai na makakalusot sa Palaro

AN regional screening committee kan Department of Education (DepEd) sa Bicol an nag-asegurar na mayong makakalusot na fekeng parakawat sa gigibohon na Palarong Bicol sa Marzo 19-25, 2006.

Si director Celedonio Layon kan DepEd Bicol nagpahayag sa miembros kan media na magiging estricto na an saindang comite nganing maibitiran an pag-gamit kan ibang atleta na bako man na registradong estudiantes kan escuelahan na kabali sa Palaro.

Kun igwang madakop na fekeng atleta kan sarong escuelahan bako lang an coach an hahagopon nin caso envez kabali an principal pababa sa class adviser.

Pigsugo na kan DepEd Bicol an mga district supervisor na sernihon na marhay an gabos na listahan kan mga atleta asin kaipuhan na macierto na ligitimo sindang parakawat kan saindang provincia asin ciudad.

Obligado an mga atleta na magsumiter kan saindang picture album asin ini kakapotan kan winning committee.

Sa hinaman na guidelines kan screening committee bako lang an mga coach an puedeng mag-atubang nin caso asin kabali na an school principal, paratukdo, district supervisor sagcod na an atleta may certificacion na firmado kan saindang class adviser.

Igwa nang pinaluwas na memorandum kaini an DepEd sa gabos na mga district supervisor sa anom na provincias asin pitong ciudades kan kabikolan na participantes sa Palarong Bicol 2006 na gigibohon sa Metro Naga Sports Complex sa Brgy. Pacol, Ciudad nin Naga.

An DepEd Bicol naging estricto na sa mga atleta nganing malinigan an pangaran kan arin man na escuelahan o provincia/ciudad na posibleng nagkokoang fekeng parakawat an ibang pasaway na coach.

Kadakli kan mga caso sa darayaan sa mga Palaro iyo an pagkoa nin atleta na bako naman na estudiante asin dati nang naging champion sa mga nagkaperang competicion na binabayadan sana kan coach o kan escuelahan ngani sanang mang-gana an saindang team dawa sa maating laban.