Jueteng
mabalik sa CSur
SAGCOD
sana sa Buhi asin Bato, sakop kan cuarto distrito kan Camarines
Sur an ginibong operacion kan anti-illeal gambling task force kan
DILG asin PNP contra sa ilegal na sugal na jueteng, buhay pa an
jueteng sa Goa, sakop kan tercer distrito, alagad ibabalik an
centralisadong operacion sa laog kan bulan nin Marzo 2006.
Paralisado an operacion kan sugal sa Camarines Sur afuera sana sa
tercer distrito na sagcod kasuodma nagpapadagos pa an gugo, susog
sa pinaabot na sombong kan sarong consejal na dai na nagpasambit
kan saiyang pangaran.
An task force na pinamayohan ni Sr. Supt. Antonio Laña nagsakyada
kan pagugoan kan jueteng sa Bato asin Buhi kan Marzo 9 asin 33 na
mga correador an mga nagkadarakop, mayong naarestar na capitalista.
Nakasamsam nin mga taya sa jueteng asin baby armalite sa safehouse
kan mga empleados kan sinambit na ilegal na sugal.
An mga capitalista sa jueteng sa premiro, segundo asin cuarto
distrito kan Camarines Sur suspendido muna an saindang operacion
huli ta naghahalat pa nin saindang operacion huli ta naghahalat pa
nin instruccion na dai nang kaulangan sa halangkaw na oficial nin
awtoridad.
Kun dai pa nagsakyada an grupo kan task force dai ma-iimplementar
ni P/Sr. Supt. Romeo Mapalo, PNP provincial director an “one
strike policy” ni PNP Chief Director General Arturo Lomibao.
Hinagop na kaini iyo sinda P/Inspector Eduardo Regalario, jefe de
policia kan Buhi Police Station asin si P/Chief Inspector Cerilo
Trilles kan Bato Police Station na tulos pig-haklas ni Mapalo sa
saindang mga destino.
Kun tulong magkasurohay na gugoan nin jueteng an nasakyada kan
task force ciertong kabali an provincial director, sabi pa ni Sr.
Supt. Laña.
Sagcod kasuodma an mga gugoan nin jueteng sa mga banwaan kan
Libmanan, Del Gallego, Sipocot, Libmanan, Pasacao, Calabanga asin
Pili an dai pa nakakabalik sa normal na operacion huli ta mainit
pa sa sainda an task force.
Sinabi ni Mapalo na andam niyang simbagon sa campo crame an
nangyaring pagkakadakop kan operacion kan jueteng sa saiyang area
of responsibility (AOR), alagad dai man daa siya nagpapabaya mala
ngani igwa man nadakop na correador sa jueteng sa Buhi.
Si Mapalo, kabali sa nagfirma sa Krusada Laban sa Jueteng kan
ilansar sa ciudad nin Naga na an naging visita si Obispo Oscar
Cruz, dai man naheling an saiyang kakayahan nganing mapuho an
sugal envez an saiyang pigdadahilan na E-Z 2 bakong jueteng an mga
pasugal sa provincia.
