---

Mining brgys kan Lafayette,

sakop na nin mga CAFGU
Ni Jason Neola

RAPU-RAPU, Albay – Maigot na dinidiscubre ngonian kan Bicol Alliance Against Mining (BAAM) an rason kan gobierno sa lagduan na pag organizar nin mga volunteers para sa Civilian Armed Forces Geographical Unit (CAFGU) sa costal na banwaan kan Rapu-Rapu.

Sinabi kan Tanggol Kalikasan sa provincia nin Albay na mayo sindang naheheling na dahilan kun taano ta kaipuhan sa banwaan na ini mismo ginigibo an pag-recruit asin pag-training kan mga volunteers mantang kadakol nin mga lugar sa provincia nin Albay na nababagay para sa nasambit na actibidad.

Ipinahayag kan BAAM na kun padagos na tatawan nin dalan an pagkalap nin mga volunteers para sa Cafgu sa nasambit na lugar madara ini nin pagkakabaranga kan comunidad asin magiging maluya an pag ulang sa operacion kan Lafayette.

An Cafgu saro sa mga pangsabat na fuersa kan Philippine Army sa mga rebeldeng NPA sa mga kabukidan.

Ipinahayag kan BAAM sa ipinadarang statement sa Bicol Mail an kahandalan na namamatean ninda huli kan makusog na pag organisar nin mga Cafgu volunteers sa mga barangay kan Malobago, Pagcolbon, asin Binosawan anas kan nasambit na banwaan.

Segun sa report na ipinaabot sa periodicong ini, an mga nasambit na barangay iyo mismo an mga lugar na pinagdeclara kan Lafayette Philippines Incorporated bilang mining areas.

An mga Cafgu, susog pa sa statement kan BAAM, armado nin halangkaw na kalibre nin mga badil na dapat ilikay sa nasambit na lugar na kun saen nagcoconducir nin lagduan na pagprotesta an mga residentes huli kan presencia kan nasambit na mining firm.

Sa katakod na bareta, makusog na pigdenunciar kan BAAM asin mga pag iribang NGO/PO an pananakot asin pagpatanid sa sarong reporter kan Bombo Radyo-Legaspi na may mangyayaring maendata sa saiyang buhay kun dai ini maluhay-luhay sa pagbatikos sa Lafayette.

Sinabi kan BAAM na saro ining malinaw sa pagsuprer sa libertad nin pagpapahayag (press freedom). Nagpahayag nin asiguracion an nasambit na grupo na susuportaran ninda an laban kan media contra sa Lafayette.

An Bombo Radyo reporter binistong si Josue “Bombo Jushua” Martinez, 30, kan Central City subdivision, Brgy. Crusada, ciudad nin Legazpi. An insidente nangyari kan Lunes, Marzo 13, sa mismong resedencia kan reporter.

Sa intrivistang ginibo kan Bicol Mail, sinabi kan mga katrabaho ni Martinez na igwa pa man sindang pagduda na an may kaggibo kan pananakot posibleng may iba pang rason afuera kan isyu dapit sa Lafayette.

An pananakot ginibo nin duwang lalaking nakasakay sa motorsiklo na parejong tahob an lalawgon nin helmet.