SA NAGA CITY PNP
100% solucion sa crimen pig-oorgullo ni Ranara
Tuason: polis dai nakakalapag
parahabon
PIG-OORGULLO kan Naga City Police Staion na sa pinaka-premirong
istoria sa liderato sana ni P/Supt. Chief of Police Ramon Ranara
nagka-igwa nin 100 por cientong crime solution efficiency sa anom
na incidenteng crimen sa record kan bulan nin Febrero 2006 sa
average the crime rate na 3.2 por ciento cada bulan. Kadakli kan
mga caso iyo an harabonan.
Ini sa pigsumiter na report ni Ranara sa ginibong regular miting
kan Peace and Order Council (POC) kan City Hall kan Martes (Febrero
28) na pigbasa ni P/Chief Inspector Nicanor Garcia.
Alagad si bise alcalde Gabried H. Bordado, Jr., presiding officer
sa miting kan POC nabigla man kan sinambit na report apesar kan
mga sunod-sunod na reclamo nin snatching sa central business
district I orog na an pang-aagaw nin cellphone.
An paliwanag ni Garcia ini base man sana sa saindang record na si
mga caso an saindang na-isangat sa corte dawa na ngani dai paman
nadadakop an ibang mga suspechado sa crimen.
An Peace and Order Report ni Ranara sa periodo kan Enero 22 asta
Febrero 21, 2006, alagad an crime volume kan Febrero naglangkaw
nin 50 por ciento kun icocomparar kan Enero 2006 na naghuros nin
63 por ciento sa pagcomparar sa kaparejong periodo kan nagtalikod
na taon.
Kadakli nangyayari an criminalidad poon alas 12:00 nin hapon
sagcod na nin maagahon.
Sa sinambit na miting kan POC na pig-atendiran nin manlaen-laen na
sectores kadakli sa mga pinaabot na reclamo iyo an kawaran nin
solucion sa pag-agaw nin mga cellphone dawa yaon sa mga matahong
lugar. Pighagad kan representante ni Ranara sa POC na dapat
mag-cooperar an publico sa paagi kan citizen arrest.
Si dating Chief of Police Col. Jose Tuason, miembro kan POC
nagtuyaw sa policia huli kan kahugakan na maglapag kan mga
snatcher apesar na kan panahon niya mga listo an miembros kan Naga
PNP sagcod na nakikihapagan sa mga parahabon nganing madakop sana,
ngonian pinapabayaan na sanang makadulag.
Nadiscobre sa miting kan POC na igwang nagkaperang pawnshop sa
central business district an kaya naglalangkaw an caso nin pang-aagaw
nin cellphone huli ta iyo man an nag -aako kun ini pigsasangra.
Pigbuyagyag ni Garcia na an nadakop nindang cellphone snatcher si
Ricardo San Juan y Makawili nag-ako na igwang pawnshop sa Ciudad
nin Naga iyo an nag-aako kan pagsangra kan mga hinabonan na
cellphone.
Pigpagirumdom ni barangay capitan Matias Oliva kan Brgy. San
Francisco an Naga City Police na kan siya an jefe de policia digdi
saindang pigpasunod an ordenanza na an mga operator kan pawnshop
obligado na magsumiter sa policia kan listahan kan mga pig-sasangra
sa sainda. Ini sa katuyohan na masusog an mga hinabonan na
pigsangra.
Tanganing mas mapa-urog an implementacion an sinambit na ordenansa
si Roy San Ramon, representante kan media sector naghurot na dapat
i-aatubang sa miting kan POC an mga operator/ manager kan pawnshop
nganing ipaliwanag an katuyohan kan ordenanza na kun haen puedi
man sindang hagopon nin caso kan anti-fencing law kun padagos na
mag-aako kan mga hinabonan na cellphone.
