---

Cagrit nin Cowaw

“Na cagrit an Cowaw sa tahaw can nariribongan na sosyodad,
Na cagrit ta nagimata, napokawan, asin nariribaraw.
Na cagrit nin hule sa gawi can mga nagpapasaway,
Cagrit matapos na mag-atid-atid sa mga isyus can aldao”


Diktadura!

Dai mi honaon na liwat na mabongkaras an diktadura sa nacion,
Pagkatapos na mapatalsik si Marcos sa naka-aging beinteng taon!
Kaya imbis magrokyaw sa pagcelebrar can nakamtan na katalingkasan,
Nagmomondo an mga Filipino sa tahaw can panibagong kadikloman.

Sa mawot ni GMA na magdanay sa poder, kamot na batbat an pig-gagamit!
Sa mawot ma-ontok an mga criticismo, liwat martial law an sunod na ipipirit!
Sa mawot na maitago an mga korupsyon asin pag-aabuso
can mga nasa gobierno,
Dagos-dagos na pig-iiplementar an EO 464, CPR,
PP 1017 maski contra an publico!

Ano an simbag can banwaan sa pagbalga can
mga leyes asin derechos humanos?
Ano an simbag can banwaan sa pagpa-silencio can
libreng pagpahayag can mga tawo?
Ano an simbag can banwaan sa pagramal can
media asin mga demokratikong proseso?
Ano an simbag can banwaan sa padagos na
pag-aralamusa sa puesto can mga politico?

Never again to martial law!
Kaya dai ta togotan na an diktadura magdanay giraray sa satuyang banwa.
Kita magkasararo, mag-antabay, asin oponeron an nagdadangadang na banta!
Magmato kita, para dae liwat matimak-timakan an satuyang democracia
Ipaglaban ta an satuyang mga derechos, asin futuro sa ciertong disgracia!