Pag-arestar ki Beltran pigcondenar kan BAYAN
An
militanteng grupo sa Camarines Sur an pig-protesta an ilegal na
pag-arestar ki Party list Congressman Crispin Beltran kan
Anakpawis na ngonian nag-aatubang na nin casong rebellion.
Kasabay kan saindang pagprotesta sa pag-arestar ki Beltran,
nangapodan sinda na suportaran an pagcondenar kan proclamation
1017 ni Presidente Gloria Macapagal-Arroyo huli ta dakul nang mga
civilian asin oposicion an pig-arestar sagcod na pigsasahotan na
envuelto sa planong pagpabagsak kan Arroyo administration.
Si Erick Torrecampo, Secretary General kan Bagong Alyansang
Makabayan sa Camarines Sur nagsabi na an PP 1017 saro man sanang
Martial Law na ngonian dakul na an nagrereclamo sa mga human
rights violation sagcod na pigbabawalan na magconducir nin
protesta laban sa administracion.
Kaipuhan ibasura an PP 1017 tanganing ipadagos an pag-protehir kan
mga deretso humano.
Lima pang mga party list congressman an naka-atubang nin cason
rebellion na kinababalihan ninda: Satur Ocampo, Liza Masa, Joel
Virador, Rafael Mariano asin Teddy Casino, sinda bestadong mga
critico kan administracion asin pusog na nagcocontra sa 1017, sabi
pa ni Torrecampo.
Dinagdag pa kan lider kan BAYAN Camarines Sur na dai sinda
natatakot na maglansar nin protesta laban sa administracion orog
na an pag-contra sa PP 1017 mala ngani nagtalaan sinda nin protest
rally sa maabot na Marso 8, 2006.
Sa Naga City Police, si Chief Inspector Nicanor Garcia kan
mag-atubang sa Peace and Order Council meeting sa City Hall
nagsabi na sagcod ngonian dai pa sinda nakakarecibe nin guidelines
sa pag-implementar sa pagbawal kan mga gigibohon na protest rally
poon na magdeclara si President Gloria Macapagal-Arroyo kan State
of National Emergency kan Febrero 24, 2006.
