Sa people’s initiative
Kulang suporta sa mga officiales local
AN
Union of Local Authorities of the Philippines (ULAP) an dai
makakaguno nin bilog na suporta sa mga oficiales local na saindang
pangenotan an People’s Initiative nganing itulod an pag-enmienda
kan 1987 constitution.
Si alcalde Mel Gaite, pamayo kan LMP Camarines Sur chapter an hali
palang sa tiripon kan ULAP sa Manila alagad an reaccion kan
nagkapera sa mga oficiales local kabali na si mga graduating na
alcalde nagsabi na dai sinda uyon sa plano na “no election” sa
2007 mientras na an iba sa sainda interesado na magcandidatong
congresista asin vocal.
Duda sinda sa people’s initiative na dagos nang suspendido an
eleccion sa sunod na taon nganing tawan nin prioridad kan Arroyo
administration an charter change nganing ribayan an sistema kan
gobierno pasiring sa parliamentary system.
Bakong gabos na mga alcaldes an pabor sa cha-cha mientras na sa
15ng alcalde na nasa ultimo nang termino igwang nag-aambicion na
magcandidatong congresista sa maabot na eleccion. Si Alcalde Elmo
Bombase kan Tigaon, Camarines Sur an ipinahayag na planong
magcandidatong congresista sa tercer distrito nganing sabaton si
congresista Arnulfo Fuentebella asin si Alcalde Diones Belza kan
Buhi, enot nang nagconfirmar sa prensa na macandidato siyang
congresista sa cuarto distrito laban ki Congresista Felix
“Nancing” Alfelor, Jr.
Sa Baao, Camarines Sur si bise alcalde Norman Badiola dai tubod sa
people’s initiative envez kaipuhan apodon na government initiative
huli ta an gagamiton an rekursos kan gobierno.
Papahiroon an mga capitan de barangay na dai man gani uyon
mientras na dai sinda nakakaseguro na susuportaran kan saindang
residentes kan barangay huli ta disganado na sa liderato ni
Presidente Gloria Macapagal-Arroyo sa atubangan kan crisis sa
economic sa pag-implementar kan 12 por ciento kan EVAT.
Si Badiola, na puedeng mag-kinabang sa “no election” an dai pabor
sa charter change huli ta mayo siyang naheheling na mga pagbabago
sa gobierno dawa anong forma de gobierno.
