---

Silence protest piglansar

kan NGOs vs PGMA, Noli

Piglansar poon kasuodma kan NGOs asin nagkaperang mga oficiales local kan City Hall an sarong bulan na silence protest sa paagi nin pag-kabit nin mga yellow ribbon sa Plaza Quince Martires sa paghagad ki Presidente Gloria Macapagal-Arroyo asin Bise-Presidente Noli De Castro na parejong magdemiter na sa puesto.

An grupo pinangenotan kan Naga City People’s Council (NCPC) asin ni Consejal Miles Raquid Arroyo kan Sanggunian Panlungsod na nangapodan sa pagdemiter ni GMA asin De Castro.

An pagtabang sa puesto kan duwang halangkaw na oficial kan gobierno nganing tawan nin buelo an snap election para makapili an namamanuan Filipino nin bagong pamayo kan nacion, sabi pa ni Arroyo.

Pinalaba nin sarong bulan an protesta na matapos sa Abril 1, 2006 nganing ipamati sa Arroyo administration kaipuhan maghelig na siya sa puesto.

Mientras tanto, sa session regular kan Sanggunian Panlungsod kan Ciudad nin Naga kan nakaaging Lunes nagpasar nin resolucion na naghahagad ki GMA na ibasura na an proclamation 1017 huli ta natitinak-tinakan na an mga deretso kan namamanuan asin an pag-arestar kan oposicion asin iba pang mga lideres na nagcocontra sa presidente.

Bako lang NGOs an nangenotan sa protesta laban ki GMA asin paglalaoman na sa mga masunod na aldaw masuporta na an sector nin mga estudiantes asin iba pang organisacion.

Si Sr. Supt. Romeo Mapalo, PNP provincial director sa Camarines Sur nagsabi na sainda nang pigmaman-manan an sinambit na hiro protesta dawa na ngani nag-isyu nin permiso an oficina ni alcalde Jesse Robredo.