SIMBAG SA KAWARAN FONDO
Andaya, mataong ayuda sa
Palarong Pambansa '06
AN
Bicolanong DBM Secretary Rolando Andaya, Jr. nag-asegurar sa local
na gobierno kan Ciudad nin Naga asin Department of Education
(DepEd) na mapabulosan nin fondo an nakatalaan na Palarong
Pambansa 2006.
Sa pakikipag-hampangan ni Andaya sa halipot na oras na press
conference sa Metro Naga Sports Complex kan Domingo (Marzo 19),
sinabi kaini na siya bilang sarong Bicolano dai niya dapat
pabayaan sagcod an suporta financial na iyo ngonian an
pighahaditan kan DepEd na dai pa nag-aabot an fondo mientras na
duwang bulan na sana antes kan Palarong Pambansa sa Mayo 7-13 na
an Ciudad nin Naga sa ika-tolong veces iyo an presentador.
Si alcalde Jesse M. Robredo narecibe an comunicacion gikan ki
DepEd Secretary Fe Hidalgo na nag-iinformar na an Ciudad nin Naga
iyo an napili kan Department of Education management committee na
mag-host kan Palarong Pambansa ngonian na taon.
Sinabi ni Robredo na an Palarong Pambansa 2006 bako lang an Ciudad
nin Naga an mababantog an pangaran envez an Bicol mientras na an
enterong region sa nacion an maarabotan digdi sa sarong semanang
competicion.
Nagpasalamat man an alcalde ki DBM Secretary Andaya huli kan
saiyang suporta asin dai pabayaan an sinambit na Palaro. Si Andaya
iyo si naging juespe de honor sa pagbukas kan Palarong Bicol 2006
sa Metro Naga Sports Complex kan Marzo 19, 2006.
Si regional director Celedonio Layan, Jr. kan DepEd Bicol an
nagconfirmar pa ki Andaya kan decicion kan saindang agencia na
darahon liwat digdi an sinambit na palaro.
An karibal kan Naga an Puerto Princesa City, ipinahayag na si
alcalde Edward Hagerdon an dai na nagcontra na padalaganon kan
Ciudad nin Naga an Palarong Pambansa mala ngani saiya pang
pig-congratulate si Robredo.
Pigbuyagyag pa kan jefe ejecutivo local kan ciudad na an
evaluation team kan DepEd an nag-inspeccion na kan mga sports
facilities kan Naga na saindang pigpaboran na liwat maging
presentador.
An pag-aprovar nalang ni Presidente Gloria Macapagal-Arroyo iyo an
pighahalat.
